مش فارقة مسلم ولا مسيحى

مش فارقة مسلم ولا مسيحى

خلاص خلاص . أعلن الشعب المصرى والعربى والاسلامى عن قة حيلته إزاء كل المحاولات والاجراءات والرسوم المسيئة للرسول الكريم عليه أفضل الصلاة والسلام . وكأن لسان حالنا يقول يا عم وانا مالى . اللهم الا قلة قليلة خرجت مسرعة واثبة الى المظاهرات ويلا اهو برضه نص العمى ولا العمى كله . كنت مرة قولت فى المدونة بتاعتى القديمة ان اوربا دى كلها على بعضها علمانيين يعنى مش فارقة مسلم ولا مسيحى ولا اى حاجة حتى . واكبر دليل على كلامى توقيف البابا بطريرك الكنيسة المصرية فى مطار هيثرو فى لندن ومحاولة تفتيشه , ده غير السنة اللى فاتت الراوية اللى كسرت الدنيا واتحولت فيلم " شفرة دافشنى " اللى كانت بتتكلم وتغوص فى اصل الديانة المسيحية .

تهريج وكلام فاضى بجد اللى بيحصل ده . يبقى كل فلوسنا بره ونشترى منهم كل حاجة ورغم ذلك فى نوع من انواع البجاحة موجود ولسه هيفضل موجود . ده كده مع اعتبار ان الحكومة الهولندية مشكورة وكتر خيرها وقفت عرض الفيلم المسئ للاسلام من قبل النائب الهولندى اللى مش طايق اقول اسمه . وده ذكائ سياسى واجتماعى من الدرجة الاولى لأنها الى حد ما اتعلمت الدرس من الدنماراك بس بعد ما كنا شغالين كويس على موضوع المقاطعة , تقدر تقول كده الناس زهقت وكله بيقول ربنا يسهل لعباده .

طيب والحل , الموضوع بقى مش مقتصر على المسلمين وبس , ده مسلمين ومسيحين ,, واى حاجة طريقهم , تقدر تقول رسالة غامضة بتقول سيبكم بقى من الاديان اللى انتوا فيها وخليكوا زينا . نشتغل ونأكل ونلبس ونركب احسن العربيات واهو عايشين . بس واحد صاحبى فاكرنى بحاجة حلوة اوى , قعدت اضحك عليها حوالى ساعة .

كلام كده فى سركم بيقولوا انه فى الديانة اليهودية عندهم كده زى قصة او حاجة مشهورة بتقول ان كل اليهود فى الجنة وكل واحد نصيبه معروف ومقسوم عليه كمان بالكيلو ملا , يعنى مثلاً فلان ابن فلان هيأخد 6 كيلو فى الجنة . فالقصة بتكمل وتقول ان النفروض ان اليهود ميخلوش حد فى الدنيا عنده دين خالص وخاصة طبعاً اليهودية علشان كده نصيبك هيقل فى الجنة وبدل ما كنت هتأخد 6 كيلو هيبقى نصيبك 5 كيلو او الكيلو 4.5 الماظة - ابقى قابلنى - عند اول النادى الأهلى . ف بصراحة الاحساس ده جالى من ساعة الاحداث دى تتوالى على المسلمين والمسيحين بالذات ومفيش حد قادر الا رب العباد فعلاً هو اللى يأخد حقنا منهم .

ع العموم الناس برضه محتاجة توعية وثقافة مع كيفية التعامل مع مثل هذه الازمات . بس واحد صاحبى تانى خالص وانا بتكلم عن المقاطعة وازاى نستفيد من الاحداث اللى بتحصل علشان نبقى كلنا ايد واحدة جه جنب ودانى وقالى سؤال معرفتش ارد عليه , قالى اما انت حلو اوى كده وبتقول مقاطعة مقاطعة !! ما تستوردش بقى منهم انسولين لمرضى السكر فى مصر لأن الدنماراك بتنتج منه 70% وزيادة يا جميل . بـــــــــــصيت وقــــــــــــلت

حسبى الله ونعم الوكيل

نصائح من الاّخر الجزء الأول

نصائح من الاّخر الجزء الأول

اولاً ازيكم اخباركم ايه ؟؟ وحشتونى جداً خلال الاسبوع اللى فات , الموضوع اللى هتكلم فيه النهاردة عن الوظائف , هى شوية نصائح من عبد فقير الى الله لعلها تكون فى ميزان حسناتى ان شاء الله وده مش علشان انا بشتغل او علشان اقول الكلام ده لواحد مش بيشتغل , لكن الفكرة كانت من كمية الميلات اللى جاتنى وبتسألنى عن الوظائف .. وواحد الاقيه يقولى يا عم الاموور وانت مالك بينا ؟؟ هو انت كنت واصى علينا وهكذا يعنى . انا ياجماعة بجمع ليكم معظم الوظائف اللى بتنزل فى الجرائد وخاصة جريدة الاهرام وبكتبها هنا . يمكن اكون سبب فى انى افتح لواحد باب رزق وده يبقى فضل من ربنا سبحانه وتعالى .

انتوا شايفين قد ايه الحياة بقيت صعبة على كل الناس الغنى قبل الفقير وانا بحاول اعمل اى حاجة يمكن تكون فى ميزان الحسنات الله اعلم . نرجع بقى لمحور كلامنا النهاردة عن الوظائف .. انا هنا بكلم محاسبين وخاصة محاسبين حديثى التخرج حالتى يعنى . وهحاول اشرح ببساطة الطرق الطبيعية اللى ربنا بيكرم الواحد فيها وفى النهاية بيشتغل فى مجاله ..

1- بعد ما تطلع الشهادات المؤقتة من الكلية وتشوف الموقف من التجنيد . كده انت قطعت شوط كبير اوى فى الوظيفة . لأن انت فى ايدك المؤهل وموقف الجيش ,, كده يبقى حلو اوى ..

2- اعمل لنفسط خطة زمنية خليها حوالى 3 شهور وهقولك ليه بعد كده ..

3 - فى الفترة دى حاول تعلاف كل حاجة فى البلد ماشية ازاى . لأن انت ممكن تكون محاسب كويس اوى اوى بس مش عارف حاجة خالص الا المحاسبة وده بقى مش مطلوب دلوقتى .

4- اعلاف انت ميولك ايه " المحاسبة - التأمين - ادراة الاعمال - التسويق - المبيعات " .

5- اعمل بقى السيرة الذاتية بتاعتك بخط كويس عربى وانجليزى وياريت تكون مختصرة وبسيطة ولو انتوا عايزين , انا ممكن ارفع شوية نماذج للسير الذاتية .

6- ابدأ حصر نقاط القوة عندك " تقدير جيد - تأجيل من الجيش - شهادات كمبيوتر - انجليزى كويس " وبرضه اعرف نقاط الضعف عندك " مفيش واسطة - مش معاى فلوس اتحرك - مش عندى لبس كويس " اى حاجة انت شايفها نقاط قوة حاول تمسك فيها بايدك واسنانك ولو نقطة ضعف حاول تتخلص منها فى المرحلة دى .

7- وقبل كل حاجة ما تنساش القرب من الله عز وجل , مش علشان الوظيفة , لكن علشان ده الوضع الطبيعى . واعرف ان ملك الملوك هو اللى بيرزق العباد ولو مكتوب ليك حاجة هتأخدها ان شاء الله حتى فين لأنه رزق ونصيب .

ها اتفقنا على الحاجات دى مؤقتا .......... طيب خلاص نكمل المرة الجاية

لسانى عاجز عن التعبير

لسانى عاجز عن التعبير

ميشو صديقى العزيز والله نورت البلوج يا ميشو فعلاً بجد ومش تهريج . واتمنى ان انت تكون بصحة جيدة وكويس وفى افضل حال ان شاء الله . اما على موضوع اضراب يوم الاحد الجاى , فأنا فى الشغل قالوا اللى هيغيب هيتفصل على طول حتى من غير تحقيق فمش عارف لسه ظروفى .

يا جماعة ميشو ده من زمن الصداقة الجميلة المبنية على الحب والتعاون , ياما ضحكنا سوا وياما بكينا سوا .. وكتير اوى نبقى ماشيين ومش معانا حتى ربع جنيه . يا صديقى العزيز افتقدك بشدة انت وابو صلاح . يارب يكرمك يا ميشو ويكرمك يا ابو صلاح ودايماً كده تكون فى احسن حال وتفرحونى قريب وحد فيكم يخطب بقى . علشان نعرف ليه المخطوبين بيبقوا بيضحكوا على طول ؟؟ .. ان شاء الله خيريا ميشو واشوفك عن قريب ..

ســــــــــــلام

مين يشترى الحديدة ؟

مين يشترى الحديدة ؟؟

اول مرة اتكلم عن الحديد هنا فى باب نظرية برضه . وطول الوقت اللى فات مكنتش عايز اتكلم لأنى انا شخصياً مش فاهم ايه اللى بيحصل . بس الحمد لله بدأت افهم شويه بشويه . الحديد فى مصر بتنتجه كذا شركة عندك حديد عز وشركة بشاى للصلب وكل شركة لها حصة فى السوق . ده طبعاً مع اختلاف طبيعة الحديد من حيث اللفائف او الحجم وهكذا .بس عموما السعر مش بيفرق كتير . الحديد بقاله فترة سعره مش مستقر ويتحرك من 4000 الى 5000 الى 6000 وهنفضل كده . لسبب بسيط جداً لأن احنا المصريين مش عندنا ثقافة " هعلمك الأدب " . الثقافة دى احنا مش عارفين نطبقها فى السلع البسيطة فاكيد عمرنا ما هنطبقها فى السلع الاساسية - سلع مواد البناء والتشييد . مرة حصل فى لندن فى التسعينات ان البنزين زاد كام سنت , راحوا الناس ومن غير تجمعات ولا تظاهرات ولا اى حاجة ولا حتى اعتصامات ولا حتى يعرفوا ولا اتصلوا ببعض , قالوا خلاص مش هم غلوا البنزين , احنا بقى مش هنستخدم عربيتنا وهنستخدم مواصلات الدولة . وطبعاً اى دولة فى العالم مواصلاتها متقدرش تستحمل السكان اللى فيها . يعنى من الاخر لندن جالها شلل والقرار اتغير خلال 12 ساعة . طيب واحنا هنروح بعيد ليه , هنا فى مصر فى السبعينات حصلت انتفاضة الحرامية - ده كان تسمية الرئيس السادات - ودى حصلت لما الارز زاد كام نكلة - كانت عملة فى مصر وانقرضت - والناس قامت وهاجات على منع الدعم ورفع السعر كام نكلة .

انا مش بقول الكلام ده علشان نروح نعمله لان احنا دلوقتى عمرنا ما هنعمله ابداً ابداً . زمان كانت الناس مهما كانت اختلافتهم بس ايد واحدة وخايفين على بعض وبيضربوا بايد من حديد على الفاسد بينهم , لكن دلوقتى كل واحد عايش مع نفسه وبيقول يلا نفسى , انا ما دام عايش كويش يبقى خالص . يبقى كده زى الفل . ده مع اعتبار ان الدولة لها مسؤلية وبدأت شويه تصحح الاوضاع زى مثلاً قرار وزير الصناعة بمنع تصدير الارز للحد من ارتفاع الاسعار ومواجهة الطلب المحلى . يبقى المشكلة كلها فى التجار وخاصة تجار التجزئة الكبار لان الصغيرين بدأوا يطلعوا من السوق لانهم مش قادرين على تنفيذ التزامتهم لدى العملاء . والله يا جماعة الحديد دلوقتى بقى بالرقم , يعنى تروح تحجز وانت مش عارف السعر ولما يجى دورك , يبقى تروح وتعرف السعر الماشى فى السوق وتدفع تمن الحديد .

اه الحمد لله على النعمة اللى هو فيها . اى حد دلوقتى بيسألنى عن حالتى المادية بقوله انا بقيت على الحديدة , جه واحد صاحبى وقالى ها تبيع الحديدة ؟ , روحت قايله لأ يا حبيبى خد دورك واقف فى الطابور ... اهههههههههههههه مش بقولكم محدش بقى عبيط فى الزمان ده ..

وظائف خالية للمحاسبين فقط

* مطلوب محاسبين حديث التخرج وخبرة لشركة مقاولات كبرى
للاتصال yourcvnow2008@yahoo.com

* Junior Accountant
للاتصال careers@bags.group.com

* لشركة سياحية بالزمالك " مطلوب محاسبين خبرة "
للاتصال g.marriott@link.net

* شركة فلورا " محاسبين خبرة من 2-3 سنوات "
للاتصال ppm@flora.com.eg

* مطلوب فوراً للرياض " محاسبين خبرة سنتين على الأقل "
للاتصال abo_el_ela@yahoo.com

* لشركة كبرى " محاسبين خبرة من 3-5 سنوات "
للاتصال admin.vacancies@gmail.com

* لشركة القحطانى بالسعودية " مشرفين تنمية عملاء "
للاتصال info@alfaisalrec.net

* بنك دبى التجارى " محاسبين خبرة من 5-6 سنين "
للاتصال recruitment@cbd.ae

* لشركة كبرى " محاسبين ومش محددين الخبرة "
للاتصال jobs@midgroupintl.com

* محاسبين حديث التخرج
للاتصال 0112601009 - 29203671

* مجموعة كبرى بالسعودية " محاسبين للعمل كموظفين تأجير سيارات "
للاتصال alfaihaa2000@yahoo.com

الأسمنت فين ؟؟

الأسمنت فين ؟؟

* فى قضية احتكار الأسمنت المتهم فيها 20 شخصاً من قيادات شركات الأسمنت , بالاتفاق فيما بينهم على رفع سعر الاسمنت الى 400 جنيه . وحياة أغلى حاجة عندكم اسمعوا دفاع المتهمين قال ايه !!

الدفاع قال ان الحكومة هى السبب فى ارتفاع الاسعار . طيب ازاى ياعم ؟ .. دلل الدفاع بأن الحكومة هى السبب فى قلة المعروض من الاسمنت فى الاسواق . والذى لا يكفى احتياجات السوق . وقال الدفاع ان الحكومة امتنعت عن اعطائ تراخيص جديدة للمسثمرين لبناء مصانع جديدة للأسمنت . الأمر الذى ترتب عليه عدم قدرة الشركات على الوفاء بالاحتياجات الكاملة لسوق الاسمنت . فى ظل ثبات طاقتها الانتاجية مع زيادة الطلب على الاسمنت .

نبسط الموضوع اكتر شويه . حركة السوق بتتوقف على الطلب والعرض يعنى لو كان المعروض من السلعة 100 طن والطلب 90 طن يبقى مفيش مشكلة . لكن المشكلة فى ان يكون المعروض من السلعة 90 طن لكن الطلب 100 طن . والايام دى فى مصر بسم الله ما شاء الله الطلب كثير اوى اوى على الاسمنت لأن المشروعات كتيرة ومحتاجة ضخ اسمنت باستمرار منها مثلاً ( مشروع الرئيس مبارك فى 6 اكتوبر باستخدام الحوائط الحاملة - ومشروعات شركة طلعت مصطفى مدينتى ومشروعات دمااك ومشروعات شركة الديار القطرية) وهكذا . فمنطقياً المفروض ان الحكومة تحاول توفر الاسمنت لتسهل الاجراءات على المستثمرين . لكن الحكومة وزى ما قال الدفاع عن المتهمين لم تسمح بأى مصنع بزيادة الانتاج مع وجود ضروة من الشركات لتصدير جزء من انتاجها للحفاظ على حصتها فى الاسواق الخارجية . بس احنا برضه مش عايزين نعلق كل حاجة على شماعة الحكومة لأن الحكومة برضه لو كانت سمحت للمصانع بزيادة الانتاج كان ممكن يحصل حالة تشبع فى السوق ويقضى على السوق خالص ..

طيب والحل ؟ الحل عند انجلترا والدول الاوربية , الناس دى اشترت دماغها وبطلت تصنع اسمنت . لأن مصانع الاسمنت هى اكثر المصانع ضرراً وتلوثاُ بالبيئة . وبتعتمد اعتماد شبه كلى على الدول النامية فى استيراد الاسمنت . طبعاً احنا عمرنا ما هنعمل كده لأن لوعملنا كده هيبقى كارثة على المصانع والاسر اللى بتأكل عيش - كلام اى حد بيفهم وعايز يعيش - بس ممكن نتحكم فى السوق . وهنتحكم فى السوق فى الوقت اللى تكون الدولة صاحبة سلعة مش صاحبة قرار . نتخيل ان الدولة عندها مصنع اسمنت وبينتج الطن بسعر 200 جنيه لأنه مصنع مش ربحى مش عايز يكسب قد ما عايز يعمل توازن فى السوق . طبعاً المنافسين مش هيقدروا يبيعوا ب 400 جنيه . فلازم طن الاسمن هيرخص .

الموضوع مش برضه ببساطة كده ومش هيحصل من يوم وليلة . الموضوع اعمق واشمل . بس اللى عندهم الاهرامات بقالهم 7000 سنة قادرين انهم يعملوا حاجات كتيرة منها احترام المستهلك المصرى واحترام السوق المصرى.

عملية الخصخصة

1

الخصخصة

عملية الخصخصة هى عملية اقتصادية بحتة تحدث فى العديد من بلدان العالم واذا اتم استغلالها جيداً , تكون ذات جدوى
اقتصادية . اما اللى حصل فى مصرنا الحبيبة حاجة تانية .
- بعد بيع كام بنك كده على كام شركة حلوة على كام الف فدان على الماشى , كان لازم أسأل نفسى هو حصيلة
الخصخصة بتروح فين؟ طيب لو قولتلك أن كمان فى عجز فى فلوس التأمينات !! طيب كمان حاجة تانية , فى عجز
أساساً فى الموازنة العامة. تعالوا بقى نبسط الموضوع .
مصر عندها إيرادات " قناة السويس , غاز طبيعى وبترول , ثروة صناعية وزراعية " . يقابل الإيرادات دى
مصروفات " أجور الموظفين , الدعم " وأنا فكرت بس الاتنين دول لأن الصرف عليهم بالميارات .
بما ان مفيش هيكل وظيفى سليم فى الحكومة والمحليات . يبقى اكيد فى زيادة فى الأجور غير مقابل ليها زيادة فى ا
لإنتاج ( وصل عدد الموظفين قطاع عام الى 6 مليون موظف ) .
الدعم . سلع يتم دعمها لكى يستفيد منها الجمهور الجمهور " السكر والزيت والسمن ومشتقات البترول " يعنى مثلاً
أنت بتكسب 10 جنيه وبتصرف 11 جنيه يبقى حاجة من الاتنين , اما تزود دخلك أو تقلل نفقاتك . حالياً ما ينفعش فى
مصر زيادة إيرادتها لأن مصر دخلت عصر السوق الحر وما كنتش مستعدة لكده . والسوق الحر هو السوق العالمى الذى
يتغير طبقاً لاقتصاديات الطلب والعرض .. ده غير ان الفترة الأخيرة دخلت وبتشجيع من مصر استثمارات أجنبية فى
عديد من المجالات , وده حاجة كويسة بس لو كان عندك اقتصاد كويس من الاول . يعنى من الاخر انا عابز اوصل للحل
الاخير اللى هو تقليل النفقات . ونجرب ايه اللى احنا بنصرفه ؟ وفين ؟ وعلى مين ؟ وهل يستاهل ولا لأ ؟. وده يسمى
سياية التقشف . هتلاقى المعادلة رجعت وبقيت بتكسب 10 جنيه وبتصرف 9 جنيه . ساعتها تقدر تقف مع نفسك
وتقول ازاى اكبر ايراداتى ؟ ازاى ؟ ومشاريع ايه اللى ادخل فيها ؟ وده مكسب ولا خسارة ؟ . ده مع مراعاة عدد
العاطلين فى البلد مع مراعاة نسبة الخريجين كل سنة فى جميع التخصصات . الزيادة السكانية والله نعمة بس لو عرفنا
قيمتها . عرفنا نوزع نفسنا فى مصر . نروح سيناء ونروح الوادى الجديد ويتم العمران فى البلاد دى. احنا دخلنا مرحلة
نكون او لا نكون من 3 سنين وبصراحة فشلنا فى ال 3 سنين . مش معنى كده ان احنا وحشيين . معنى كده ستوب
ومراعة الامور الاقتصادية بكل الزوايا وفى النهاية " من لم يستطع اصلاح الخطأ فكأنه ارتكب الخطاً مرتين