الحلم ........ قصة الصعود

الحلم .. قصة الصعود 2

ومن باب اللى يعيش ياما يشوف . ازداد بزوغ ظهور جميل الحمش داخل الحزب الحاكم والدولة وكان ساعتها مصاحب فى رئاسة بنك معروف شلة معينة . فقام بمحاولة تغيير صورة الحزب من كونه حزباً مترهلاً فاسداً الى منظمة سياسية حديثة وكان شعار المؤتمر العام للحزب فى 2002 يعكس هذه المحاولة " قلب ميت " وهنوريك اللى عمرك ما شفته . وبعد أن كان الحزب مليئاً بأصحاب الجلاليب والعمائم من الفلاحين . اصبح يغض برجال الأعمال من أصحاب البدل الأنيقة والدرجات العلمية الرفيعة وخصوصاً من كلية الاقتصاد والعلوم السياسية التابعة لجامعة القاهرة , لحد ما جاءت الوكسة الكبرى . فى صيف عام 2004 سافر الوالد الى المانيا لإجراء عملية جراحية بالعمود الفقرى وعندما عاد تم تشكيل مجلس وزراء جديد وكان مفاجأة بسبب ما احتواه على عدد من الوجوه الجديدة المحسوبة على جميل الحمش ومنهم وزير المالية و وزير الاستثمار و وزير الصناعة والتجارة .
وبعد كده هتلاقى وزير الاسكان و وزير الصحة و وزير . ولحد دلوقتى بزوغ فى الحياة السياسية وقوة فى الاقتصاد بس ياخسارة الحلو ما يكملش لم يحقق جمال مبارك اى شعبية لدى المواطن المصرى بل ان الناس اصبحت تكرهه منذ ان تواصل صعوده السياسى لادراك عام منهم بأن كل هذا بفضل والده وليس عن قدرات حقيقية . لكن أين الخروج ؟ كل ده وبرضه لسه ما مسكش حاجة فى ايده . بالعربى كده لسه ما قفش حاجة والتجارب كتيرة ابن ملك المغرب حكم المغرب وابن ملك الأردن حكم الأردن ده حتى بشار مع ان البلد هاك زينا جمهورى رئاسى ,. اشمعنا احنا ما اهو برضه لازم الواحد يكون حاسس بالراجل.
ودارت المحادثة التالية :
جميل : اشمعن دول يابابا يمسكوا الحكم وأنا لأ ؟ هو أنا ناقص أيد ؟؟
الوالد : خلاص يا بنى أنت تؤمر يا برنس
وخلى بالك ان الكلام ده حصل فى ساعة صفا ذهنى ونفسى عالى اوى فبدأت لعبة التعديلات الدستورية فى 2005 و 2007 ولو رجعنا للتعديلات وقعدنا نتكلم فيها تلاقيها ابعدت اى احتمال لخوض ظابط عسكرى الانتخابات الرئاسية والموضوع بقى متفصل على جميل الحمش । اموت واعرف مين ترزى القوانين اللى عمل كده ؟؟؟
يتبع فى الحلقة التالية

الحلم .. قصة الصعود من سان جورج الى أمريكا

الحلم .. قصة الصعود

تعرفون من هو وأنا أعرف من هو ولكن هو لا يعرف نفسه!؟ أو قل يحاول ألا يعرف نفسه!؟ هى قصة الحلم والصعود . قصة الأمل الممزوج بالطمع , هى قصة الشهوة وياليتها شهوة نساء ولكنها شهوة السلطة . انها قصة البرنس جميل الحمش . قد تكون تحبه أو تكرهه . تتفق أو تختلف معه لكن يظل فى النهاية فتى أول , نجم شباك من الدرجة الأولى . من ابن رئيس الى رئيس فعلى . على الورق هناك رئيس ولكن فى المطبخ أدوات أخرى . جميل الحمش أصغر من عليوة أخوه . عنده 45 سنة فى شهر ديسمبر 2008 . متزوج من السيدة/ خضرة الجمل منذ عام وأكثر . حصل جمال على الليسانس والماجيستر من الجامعة الأمريكية بالقاهرة ثم عمل فى فرع بنك أوف امريكا فى القاهرة ولما ربنا كرمه والعملية مشيت معاه انتقل للعمل بفرع البنك فى لندن . عاد جميل فى الثمانينات . أسس شركة للإستشارات المالية ثم أسس جمعية جيل المتحولون فى جامعة القاهرة . لحد كده والموضوع ماشى حلو اوى . لحد ما الموضوع سخن وبدأ جميل يتدخل فى السياسة المصرية بالتوازى مع نشاطه فى عالم البيزنس والبنوك . فى الأول تم تعيينه فى مركز الأعمال الرئاسى المصرى الأمريكى وهو مجلس شارك فى تأسيسه كل من السيد الوالد ونائب الرئيس الأمريكى . ثم بدأ جميل الحمش يصاحب والده فى السفريات الرسمية وخصوصاً الولايات المتحدة الأمريكية وأصبح يحضر منتدى الأقتصاد العالمى فى منتدى دافوس بسويسرا . برضه ده ملعبه اللى بيفهم فيه .
العملية سخت أكتر وفى سنة 1999 ازدادت التقارير والشائعات بأن جميل الحمش ينوى ومجموعة منتقاة من الشخصيات البارزة داخل الحزب الوطنى لتأسيس حزب جديد بعيداً عن الحزب الوطنى , لكن المنظر مكنش هيبقى عاطفى . وفى سنة 2000 بدأ الدخول الرسمى لجميل الحمش فى الحياة السياسة المصرية عندما تم تعيينه فى فبراير من عام 2000 فى الأمانة العامة للحزب الحاكم وأصبح رئيساً لما سمى فى ذلك الوقت بلجنة الشباب والتنمية . ثم بدأ يجوب محافظات مصر يلقى الخطابات ويتحدث للشباب عن القضايا السياسية والفنون الاقتصادية الداخلية .
سنة 2002 تم طبخ وتسوية لجنة جديدة اسمها أمانة السياسات وأصبح رئيساً لهذه اللجنة ولم يمر وقت قصير حتى أصبحت هذه الأمانة – لاحظ الكلمة- هى مركز الجذب للتوجيهات السياسية والاقتصادية فى الدولة وهى صانعة القرار السياسى فى البلد .
يتبع فى الحلقة التالية

كتاكيتو بنى يا عم البوشى

كتاكيتو بنى يا عم البوشى

" ابن فقر زى حالاتنا رقٌى نفسه لغاية مادخل زى السبع وسط وحوش الغابة وقلعهم الجلد والسقط وخباُ الخميرة فى الزنقور وكلها كام سنة ويطلع يخبز منها عيش سرايا يشبعه العمر كله .. أسد زى ده مين قال إنى غلطان فى اسمه .. نبيل ده اسم مايلقيش بيه . اللى زيه كان لازم ابوه يسميه أدهم على اسم أدهم الشرقاوى "

** ده كان جزء من احسن تعليق سمعته عن نبيل البوشى من مقال ل بلال فضل . نجوم المجتمع بلا اسشناء . ليلى علوى- اللى مش عارف إيه نظام الجواز عندها دلوقتى !؟ . ميمى الشربينى – معلق رياضى عليه علامات استفهام بدأ يفقد بريقه . نريفانا إدريس – أكيد عارفينها . حسام حسن – مدرب سئ السمعة هيموت على فريق الزمالك علشان يدربه بس لما يشوف حلمة ودنه . وعائلة الكيلانى مجتمعة فى محمد الكيلانى ورانيا ورضوى الكيلانى وكمان بواب عمارة الحاج الكيلانى الكبير واللى زاد وغطى كابتن مصر بيبو محمود ابراهيم ابراهيم الخطيب – واحد كنت بحترمه .

كل دول طماعين . أقنعة يا برنس . استثمار ايه ده اللى يجيب 115.5% فائدة و40% فائدة ليه ؟؟ ده لو كان بيتاجر فى البودرة ماكنش جاب كده . اللى باين من الموضوع ان الواد كان مسنود- بيقولوا امين أباظة وزير الزراعة . وكانت المركب معاه ماشية زى الفل . بس الدنيا لما وريته الوش التانى والفلوس بخ بره خلاص راحت – ما اهو كان اكيد شريك فى شركات الرهن العقارى مثلاً فانى ماى وتريدى ماك انهارو وبنوك زى ستى جروب ومورجان ستانلى باظوا وبنوك مش هترجع تانى زى ليمان برزار فالعملية بقت أكبر منه والكل أستغنى عنه .

اللى غايظنى فى الموضوع كله ومطير النوم من عينى من ساعتها مش إنى شمتان فيهم . لا يا عم ربنا يسهل لعباده ويكرم الناس كمان كمان . بس وحسب جريدة المصرى اليوم " ان البوشى قد أعطى كارته الخاص إلى رجل أعمال يعمل فى مجال الأستشارات الهندسية يدعى " م . د " وحصل منه على 2 مليون دولار إلا أن الأخير رفض إبلاغ النيابة مثلما فعل غيره من الضحايا مؤخراً لأنه " مفيش داعى " على حد قوله . يا ولاد ........ يا ولاد .........أنتوا بتجيبوا الفلوس دى منين .. ؟ راجل ياض يا بوشى .. ربنا يفك سجنك وترجعلنا بالسلامة بس ما تعملش فيها مجنون تانى

. العالم بتوع الامارات ناس صح مش ...... فاهمنى .. كتاكيتوا بنى يا بوشى

مكنش فى جديد

يا صباح الفل او مساء الفل المهم انه فل خلاص . يااه انا بقالى حوالى شهر ونص ما كتبتش كلمة واحدة . حاسس زى مايكون اول مرة أكتب . المهم انا الحمد لله كويس ماشى الحال . مكنش فى جديد علشان اكتب اقول حاجة ف علشان كده الواحد كان قاعد ساكت احسن . لأنه مش على الفاضى وعلى المليان الواحد هـ يتكلم . احياناً بيبقى السكوت من دهب وفضة وحاجات حلوة كده كتير . انا بس بحاول أطمئن الناس عليا واطمئن على الناس واقول اللهم تقبل منا شعبان واللهم يارب بلغنا رمضان . وان شاء الله خير علينا وعلى أمة المسلمين اجمعين يارب . اراكم قريب اوى مع مقالات جديدة وكلام جديد وحاجات جديدة ان شاء الله . وشكرا لكل اللى سأل عليا فى البلوج او بعت رسالة على الميل , بجد اللسان عاجز عن الشكر . سلام

تاريخ البلوج ده

تاريخ البلوج ده

1. النهاردة مش هتكلم عن الاقتصاد ولا عن قصة اجتماعية ولا حتى عن حالة سياسية انما هتكلم شويه عن البلوج ده وبعض علامات الاستفهام عليه .

2. انا بشكر كل الناس اللى بيبعتوا ليا رسائل على الميل سواء بالنقد او التوجيه او النصح او اى حاجة لانها فعلاً بتكون منارة على الطريق وبقدر بيها اصلح اخطائى واعرف انا ماشى ازاى ورايح فين .

3. البلوج اسمه masry4ever وخلى بالك من رقم 4 لأنه مهم جداً علشان حصل التباس عند الناس بينه وبين بلوج تانى , البلوج ده طلع للنور اغسطس سنة 2005 وبيعتبر من اقدم البلوجات فى المنطقة العربية كلها وعلشان كده والحمد لله البلوج بيتمتع بمصداقية كبيرة فى الاوساط مجتمعة .

4. البلوج ده مرّّّ ب 3 مراحل لحد دلوقتى , اول مرحلة من اغسطس سنة 2005 لحد نهاية سنة 2006 وكنت ساعتها بكتب فى اى حاجة واى موضوع بس كان اغلبية المواضيع عن الجامعة والنتيجة واللى حصل النهاردة والكلام العسل ده , وانا فاكر ان انا صورت فيديو ورفعته هنا ومش هنساه ابداً وكان عبارة عن واحد بيحاول يتعرف على واحدة وهى مترددة فى القبول او الرفض وكانت مدة الفيديو 40 ثانية بس لكن عمل ضجة ساعتها ملهاش حل , والمرحلة التانية للبلوج من اواخر سنة 2006 لحد شهر 5 فى سنة 2007 ودى كانت مرحلة بيغلب عليها الطابع الدينى مع معلومات بسيطة عن المحاسبة لأنى كنت ساعتها فى البكالريوس وحسيت انى بدأت افهم حاجة , المرحلة التالتة للبلوج بدأت من شهر 9 سنة 2007 ولحد دلوقتى وان شاء الله مستمرة وهى انى بعرض افكارى الاقتصادية والمحاسبية اللى انا درستها فى الكلية وبشارك المحاسبين فى الافكار والبرامج والدورات وعنوان المرحلة دى " اول بلوج اقتصادى اجتماعى فى الوطن العربى " .

5. رسالة جميلة جداً جاتلى من واحد اسمه احمد الشناوى وفيها كلام مؤثر ونصائح بجد غالية اوى عليا وانا يا ابن الشناوى لو قعدت ارد على كل رسالتك يبقى هغير اسم البلوج واخليه الرد على الشناوى لانها طويلة اوى بس انا هحاول اقولك الفكرة العامة . ياسيدى انا اسمى احمد وعندى 22 سنة وفاضلى كام يوم واكمل 23 سنة وحالياً بشتغل محاسب فى القطاع الخاص , بحب مجالى جداً ومش متخيل نفسى الا محاسب والحمد لله ربنا كرمنى بفضله ومفيش اكتر من كده خير .

6. الميل الخاص بي هو

masry4ever@gmail.com

وعلى gmail وبس وده علشان فى ناس مش عارفه الميل وبتحاول توصلى او عارفه الاسم بس مش عارفه نطاق الخدمة .
7. يا عم صطلح مشكور على مرورك الكريم للبلوج المتواضع وانت برضه مدونتك جميلة ولاحظت ان انت فى اول الطريق بس بدأيتك حلوة اوى وده شئ مبشر اوى وان شاء الله خير اما على موضوع اديسنساوى فده موضوع كبير اوى بس اللى اقدر اقوله ان انا اترفض طلبى يوم 23/7/2007 واللوحة الاعلانية الموجودة هنا لواحد صاحبى وصاحب مدونة شهيرة وان شاء الله احتمال كبير يكون بينا مشروع جامد اوى الايام الجاية .

8. فكرة البلوج جاتلى شهر 8 فى سنة 2005 بعد انفصالى عن شبكة why وده كان مشروع كويس بيضم كل الشباب ونتلكم مع بعض وكان اعز اصحابى ابوصلاح وميشو وسعد معاى فى الموضوع وبدأنا فعلاً نحضر للمشروع بس قابلتنا مشكلة التمويل فتوقف المشروع وانفصلت انا وعملت masry4ever وانفصل ابوصلاح وعمل msaae وميشو دلوقتى اسمع انه بيحضر لشغل جامد .

9. عدم ظهورى كتير فى مناسبات المدونين ده نابع من انى مش بحب اضواء لانها خادعة والشخص اللى بتسلط عليه لو كان كويس يبقى خير ولو كان وحش زى حالاتى بيأخد فى نفسه مقلب وبتبقى نكسة عليه .

10. رسالة من عائشة وبتسألنى عن الارشيف . يا عائشة الارشيف انا بعدمه تقريباً كل سنة لأن المواضيع اللى فيها خلاص بتبقى قديمة ومينفعش تتقرئ لكن اوعدك انى احضرهم ليكى وابعتلك نسخة من كل الأرشيف .

11. اعتراضى على اراء بعض المدونين وليس بصفتهم اشخاص وده حاجة طبيعية , انا بكتب فى مجال الاقصاد علشان تبقى البلد كويسة وهم بيكتبوا فى مجال السياسة علشان برضه البلد تبقى كويسة يعنى مصلحتنا مشتركة بس الطريقة هى اللى بتختلف , انا من مبدأى الحكمة والكلام المعقول مش الشتيمة على النظام والخروج على الادب , يا جماعة البلوجات دى بتتشاف بره , خلوا كلامكم بسيط شوية , وبلاش غلط لأن الصوت الضعيف هو اللى بيغلط . ما انا بقول اللى انا عايزه بس بالادب وبهدوء وببساطة , لكن مش علشان ربنا كرم بعض الناس بوصلة D.S.L ب20 اشتراك مع الجيران اروح بقى اشتم فى مصر والناس واللى فى مصر والحزب الوطنى واشتم جمال مبارك . لأ طبعاً دى ماسمهاش عيشة , انت كده تبقى مالكش رأى عمال تشتم على الفاضى وعلى المليان زى البغبان وانت مش فاهم حاجة ولا حتى عايز تفهم حاجة . حاول تقول كلمة فيها امل للناس , حاول تبسط الأمور , حاول تطلع فكرة الناس يستفيدوا منها . بجد وعن تجربة الصوت الهادئ اقوى من الصوت اللى عمال يشتم وهو مش فاهم . الناس مش ناقصة يااللى بالى بالك . " بدل من أن تلعنوا الظلام أضيئوا شمعة " .

12. زى ما كتبت يوم الأثنين اللى فات بعد احداث المحلة عن مين هو الأب الشرعى للإضراب ومحدش رد عليا الا برسالة من د/اسامة خاطر وبيقول فى رسالته ده حس الناس الوطنى هو اللى خرجهم للشوارع , وانا برد عليك يا د/اسامة طيب والشاب اللى مات " احمد على مبارك " اللى عنده 15سنة من المحلة اروح اسأل مين عنه ؟ لو رحت أسال الناس عن مين السبب ؟ هما مش عارفين ولو سألت الامن هيقولوا انتوا السبب احنا كنا بنحمى المنشاّت , يعنى من الاّخر ده اتفرق بين القبائل , بس الحمد لله انه له رب كريم قادر انه يعرف مين السبب ويوم القيامة كل واحد هيأخد حقه .

13. رسالة من هبة جوده انما دمها خفيف اوى وانا برد عليها بكل بساطة , يا هبة انا مش مرتبط وبينى وبينك مش ناوى دلوقتى , انتى عارفه بقى " العين بصيرة والايد قصيره " وكلك نظر يا هبة الدهب عيار 24 ب 161.14 يوم الأربعاء 9/4/2008 ومشكور على تهنئتك بعيد ميلادى .

14. مقالاتى على البلوج بتكون متاحة يوم الخميس باليل يعنى على فجر الجمعة تقريباً وملحق الوظائف المجمعة من الجرائد الخاصة بالمحاسبين بتبقى يوم الأثنين .

15. أ/ انور صادق . شكراً على رسالتك . والله من اجمل الرسائل اللى عندى فى البريد بس يا أستاذى الفاضل ما أدى انت شايف " سرقة حوالى أربعين جهاز كمبيوتر وحريق مدرستين ووفاة شخصين واصابة العشرات من الأمن المركزى " , ده يرضى مين يا أ/ انور . يا استاذى الفاضل حملة يوم 6 ابريل كان سمها خليك بالبيت , شفت حتى الأسم حلو ازاى . وللعلم انا لا مع الاضراب او ضده بس انا شايف انه مكنش وقته . يعنى توقيت خاطئ ده غير انى ليا تحفظات فى كيفية ادارة الإضراب ,,, بـــــــــــــس كده

16. انا لا انتمى لاى حزب سياسى فى مصر او تيار او حركة او جماعة او اى شكل من اشكال الأرتباطات لأنى لو انضمت لحزب يبقى ضمنياً موافق على جميع مواقفه وانا بحب يبقى رأى من دماغى وتبقى تصرفاتى من شخصيتى ومحدش يتحكم فيا .

17. الخلاف بينى وبين حسن القاضى خلص . وده جه عن طريقة نشره مقال اقتصادى فيه مغالطات , رديت عليه فزعل منى وكان حالف مايكلمنيش – الظاهر انى كنت مزودها شويه , لحد ما قابلته يوم الأحد اللى فات فى مكرم عبيد وشرحتله فكرتى وشرحلى فكرته بعد ما قالى دروس فى التواضع – حسن عنده 35 سنة – بس ده مشهور فى مواليد برج الحمل انهم دايماً بيأخدوا دروس فى التواضع . ابو على ليك وحشة يا غالى ودايماً حسك عامر فى الدنيا وانت برضه اخوى الكبير , والكبير معودنا على الصبر على الصغير , يا ابو ملك حمد على السلامة .

18. التعليقات هفتحها قريب . وانا كنت قفلتها لأنى حسيت انها وسيلة للدعاية لكن ان شاء الله قريب اوى هفتحها .

19. نكتة جامدة موووت بعتها محمود عيسى . يا حوده خلى بالك بنكتة واحدة دخلت سيف البنا المعتقل ونكتة ثانية ودت زينب الغزالى فى داهية . , يا ابنى انت بالنكتة دى تأخد اعدام مستريح .

20. نهاية الكلام تأمل حياتك وانسى ماضيك وعش بكرامتك فإنك تعش حياة الملوك وكل سنة وانتم طيبن .

رجل الحمل .. رجل الحمل بلا منازع

رجل الحمل .. رجل الإثارة

من كتابات الفلكى الايطالى " رومانو " ومع انى مش بصدق الكلام ده بس لاقيته حلو اوى ويستاهل انى اكتبه فى عيد ميلادى .

اذا درسنا عن كثب مولداً كهربائياً يعمل , او مشعلاً ناره متوجهة - اه اللى هيقرب منى هلسوعه - او قنبلة فى لحظة الانفجار - الراجل ده بدأ يغلط - . امكننا ان نكون فكرة اجمالية عن هذا النوع من الرجال , فهو رجل الاثارة بلا منازع ان كان خيراً للمرأة التى تنشد الاستقرار ان تبتعد عن دربه - والله يا عم يكون احسن برضه - , انه مشتعل العاطفة تارة , بارد كدب القطب الشمالى تارة اخرى . اذا وقع فى الحب فعلاً غاص فيه حتى اذنيه - الراجل بداً يتكلم كويس - واذا تحطم ذلك الحب لاى سبب من الاسباب عمل ما فى وسعه لجمع اجزائه المبعثرة وصبها فى قالب جديد - يعنى مش بتفرق معايا خالص - .

الاخلاص احد سماته الاساسية , لايضاهيه فى هذا الميدان احد , وبما ان الصدق مبدأه يبقى مخلصاً لمن يحب حتى فى التفكير - مش للدرجة يا عم رومانو - . اهدافه العاطفية تتسم بالنبل والجد متخطية العلاقة العابرة او اشباع الغرائز . ومطلوب من شريكة حياته لبقاء عند حسن ظنه وبذل المجهود لارضائه وجذبه والاحتفاظ به اطول مدة ممكنة - على اساس ان انا كارت شحن - فاذا فشلت تركها وراءه وراح يبحث عن اخرى ترضى مزاجه العاطفى .

اى سلاح ينجح مع هذا الرجل ؟ - المحشى علشان بموت فيه بجد - اذا لجأت المرأة معه الى الغزل الصريح المكشوف هرب بعيداً الأف الاميال. ويهرب ايضاً اذا نظرت الى غيره من الرجال - ده انا كنت اموتها قبل ما تفكر تبص - مجرد نظرة عابرة لان من صفاته الرئيسية الغيرة وحب التملك ومع انه يتوقع من حبيبته الاخلاص التام الا انه يأبى لو ظاهرياً مبادلتها بالمثل - يا واد يا تقيل - فهو مضطر بحسب اعتقاده الى اقامة بعض العلاقات البرئيةالتى تفرضها مكانته الاجتماعية - اه مش بايدى ده علشان المكانة الاجتماعية-.

هذا الرجل متمرد بطبيعته . يهوى تحدى السلطة لاعتقاده انه اذكى وافصح من اربابها . كثيراً ما تحدث له المشاكل لعدم انصياعه لغيره ولتفضيله دور السيد لا التابع - ده صحيح وانا دخلت مشاكل كتيرة بسببها - . لا يستبعد ان يحاول البعض تلقينه دروساً قاسية فى التواضع . وبهذه المناسبة يجدر بالمرأة التى يحبها رجل برج الحمل ان تقف دائماً الى جانبه ضد اعدائه وان تحب من يحب وتكره من يكره - اه انا عامل زى حسن شحاته بحب وبكره - . هذا اذا ارادت حقاً الاحتفاظ به اطول مدة ممكنة .

فى ميدان الحب يستحيل عليه التمثيل اذا هدأت عاطفته لان كل شئ فيه يشير عنذئذ الى حقيقة شعوره , يظهر فى صوته ونظراته البرود ويغلفه الضجر وقلة الصبر - ده بيحصل معايا وبيبقى شكلى وحش اوى اوى - ولكنه نبيل على الرغم من كل شئ اذا حصل بينه وبين الحبيبة سوء تفاهم بادر الى الاعتذار ولو كان الحق بجانبه - مش بيقولوا الحب سلطان - . وفى الاوقات العادية يشبعها مديحاً وثتاء ويلازم سريرها فى اوقات المرض - على اساس ان احنا مش ورانا شغل - ولا يتردد فى الانفاق عليها بسخاء بالغ . انه يتمناها انثى بكل ما فى الكلمة من معان وفى الوقت نفسه ينمى فيها روح الاستقلال والفردية , شرط الا تتخطة حدودها - هعمل فيها سى السيد- وتتبوا مكان الصدارة الذى هو من حقه وحده وان كان لا يعنى تماماً ما يقول . ولما كانت العواصف تمر عليه بسرعة مذهلة دون ان تترك اثراًُ يتوقع من حبيبته النسيان والمغفرة مهما بلغت درجة الاسى الذى سببه لها . اذن امام مولود برج الحمل احتمالان لا غير : اما ان يسود - يعنى ابقى سى السيد - او ان يترك البيت من غير عودة وعلى زوجته بدورها الا تكون سلبية او خجولة اكثر من اللازم .

سخاء هذا االرجل لا يضاهى فهو لا يبخل على حبيبته بشئ - ياما جبنا حاجات وهربت بيها - مهما قلت سبل والمورد . خير لها اذن ان تمد يد المساعدة بدورها فتدخر ولو القليل لتفاجئه به عند الحاجة . وما اكثر اوقات الحاجة عند برج الحمل - بتبدأ من يوم 7 فى الشهر - يكفى برهاناً على ذلك ايمانه بالمثل القائل " اصرف ما فى الجيب يأتيك ما فى الغيب " .

الرجل الحمل كأب عطوف محب يحنو على اولاده ويرعاهم ويؤمن لهم جميع فرص اللهو واللعب - عيل بقى - يتجاذب معهم الاحاديث ويشاركهم الهوايات والرياضة والنزهات وغير ذلك . كثيراً ما يدعوهم الى وجبة غذاء او عشاء فى افضل الاماكن العامة - يا ســـــــــــــلام هو انا حلو اوى كده , يا عم رومانو الحمد لله على الستر وعلى الصحة - .

صور اضراب يوم الأحد 6 ابريل فى المحلة

ايوه الصور دى من مصر (المحلة )

ولى تعليق عليها لاحقاً

ليه إضراب 6 ابريل فشل ؟؟

ليه إضراب 6 ابريل فشل ؟؟

اللى فعلاً ناوى يساعد الناس ربنا بيكرمه وفعلاًُ ربك هو اللى بييسر الحال , لكن اللى حصل يوم الأحد الموافق 6/4/2008 حاجة غير كده خالص , فى حد راح سخن الناس على الفكرة وبعد كده تبنتها منظمات المجتمع المدنى ونشرتها فى جميع المنتديات الخاصة بهم ده غير ال Face Book وهكذا يعنى من الاّخر مصدر الإضراب مش معروف لحد دلوقتى , لكن وبعيد عن مصدر الإضراب , انا اكتشفت ان البلد دى الناس اللى فيها غلابة اوى اوى . وهجيب ليكم الدليل دلوقتى .... 1- معظم سكان الأقاليم وخاصة الصعيد ماكنوش يعرفوا حاجة عن الإضراب ولا يحزنزن .. 2- الناس اساساً اللى عايشة فى العاصمة مش عارفه يعنى ايه عصيان مدنى ودى مصيبة اكبر . يوم الاحد الناس اختفت من الشواراع وده لأنهم كانوا خايفين على اولادهم من الصدام بين المتظاهرين والامن والكلام ده ما حصلش الا فى القاهرة ..
ميدان التحرير اللى المفروض انه يكون الحضن الامان والاب الشرعى للإضراب مكنش فيه مخلوق , انا كنت هناك على الساعة 8 الصبح وناس اصحابى كتير راحوا عشان يصوروا اى حاجة . كل اللى كان موجود هى عربات الامن المركزى . ده غير ان الجو مكنش مساعد على اى حاجة بالمرة .. طيب فين الاخوان المسلمين ؟؟ ها ها ليه دايماً الأخوان بيبعدوا عن اى مواجهة حقيقية مع النظام , بس حلو اوى ساعة الانتخابات وبس .. طيب فين حزب التجمع ؟ ها اللى هيقول هديله شيكولاته .., لا لا لا نسيت اقولكم ان فى صفقة تمت مع النظام السياسى الحاكم فى مصر لاعطاء خزب الوفد والتجمع الوناصرى عدد 19 مقعد فى الانتخابات المحلية فى الاسماعيلية . والكلام ده مش سر لان مصر كلها عارفه .. يعنى احنا قدام اضراب مش عارفين مصدره وجماعة اسلامية لها اجندتها السياسية الخاصة اللى فى وجهة نظرها اهم من العيش والسكر والمكرونة ,, احنا قدام شوية احزاب بيفرحوا بكام كرسى فى انتخابات محلية ملهاش طلب اصلاً ,,ازاى بس الاضراب كان يخرج للنور وهو فقد الاب والام ؟ ؟.. ازاى ؟؟ ازاى الاضراب ينجح فى ظل كل الظروف دى ؟؟ ده مع اعتبار سلبية قطاع كبير من الناس , لكن اللى غايظنى انا شخصياً فى الموضوع كله , صاحبى وصديقى صاحب المدونة الشهيرة اللى خرج علينا النهاردة بشعارات تقول " رجال المحلة البواسل " " النصر للمحلة " " نموت نموت وتحيا المحلة " .. روحت مكلمه وقولتله يا بنى ايه الكلام ده , هى المحلة خلاص استقلت عن مصر ولا ايه ؟؟ , وبرضه مفيش فايدة مش عايز يفهم . اقوله يا بنى معاك حق ان الامن فى المحلة ارتكب اخطاء بس مش لدرجة الشعارات اللى انت بتقولها دى .. يروح برضه مكرر عليا " نموت نموت وتحيا المحلة " . اخر اما زهقت قفلت السماعة فى وشه وقعدت ساكت فى صمت وهدوء . كل الناس فى مصر كل واحد عايز مصلحته بس . لو كان الحزب الحاكم فهو عايز مصلحته , اى جماعة تانية برضه عايزها مصلحتها , احزاب برضه عايزين مصلحتهم .. حتى الاشخاص اللى كان الامل فيهم برضه عايزين مصلحتهم عن طريق تسليط الضوء عليهم ومزيد من الشهرة ولو بشويه شعارات وعلى حساب ام الدنيا مـــــــــصــــر ..

هى دى مصر يوم 6/4/2008 , كل واحد يغنى لحاله وكل واحد مع نفسه والاسم ان احنا كلنا وطنيين . احنا كلنا بنحب مصر . يا مصريين يا اهلى الحبيب حاسبوا انفسكم قبل ان تحاسبوا . اما الاضراب نجح او فشل مش ده المهم , المهم ان احنا نتعلم من تجاربنا ونعرف مين معانا ومين اللى مع نفسه .. والحدق يفهم ! !