تاريخ البلوج ده
1. النهاردة مش هتكلم عن الاقتصاد ولا عن قصة اجتماعية ولا حتى عن حالة سياسية انما هتكلم شويه عن البلوج ده وبعض علامات الاستفهام عليه .
2. انا بشكر كل الناس اللى بيبعتوا ليا رسائل على الميل سواء بالنقد او التوجيه او النصح او اى حاجة لانها فعلاً بتكون منارة على الطريق وبقدر بيها اصلح اخطائى واعرف انا ماشى ازاى ورايح فين .
3. البلوج اسمه masry4ever وخلى بالك من رقم 4 لأنه مهم جداً علشان حصل التباس عند الناس بينه وبين بلوج تانى , البلوج ده طلع للنور اغسطس سنة 2005 وبيعتبر من اقدم البلوجات فى المنطقة العربية كلها وعلشان كده والحمد لله البلوج بيتمتع بمصداقية كبيرة فى الاوساط مجتمعة .
4. البلوج ده مرّّّ ب 3 مراحل لحد دلوقتى , اول مرحلة من اغسطس سنة 2005 لحد نهاية سنة 2006 وكنت ساعتها بكتب فى اى حاجة واى موضوع بس كان اغلبية المواضيع عن الجامعة والنتيجة واللى حصل النهاردة والكلام العسل ده , وانا فاكر ان انا صورت فيديو ورفعته هنا ومش هنساه ابداً وكان عبارة عن واحد بيحاول يتعرف على واحدة وهى مترددة فى القبول او الرفض وكانت مدة الفيديو 40 ثانية بس لكن عمل ضجة ساعتها ملهاش حل , والمرحلة التانية للبلوج من اواخر سنة 2006 لحد شهر 5 فى سنة 2007 ودى كانت مرحلة بيغلب عليها الطابع الدينى مع معلومات بسيطة عن المحاسبة لأنى كنت ساعتها فى البكالريوس وحسيت انى بدأت افهم حاجة , المرحلة التالتة للبلوج بدأت من شهر 9 سنة 2007 ولحد دلوقتى وان شاء الله مستمرة وهى انى بعرض افكارى الاقتصادية والمحاسبية اللى انا درستها فى الكلية وبشارك المحاسبين فى الافكار والبرامج والدورات وعنوان المرحلة دى " اول بلوج اقتصادى اجتماعى فى الوطن العربى " .
5. رسالة جميلة جداً جاتلى من واحد اسمه احمد الشناوى وفيها كلام مؤثر ونصائح بجد غالية اوى عليا وانا يا ابن الشناوى لو قعدت ارد على كل رسالتك يبقى هغير اسم البلوج واخليه الرد على الشناوى لانها طويلة اوى بس انا هحاول اقولك الفكرة العامة . ياسيدى انا اسمى احمد وعندى 22 سنة وفاضلى كام يوم واكمل 23 سنة وحالياً بشتغل محاسب فى القطاع الخاص , بحب مجالى جداً ومش متخيل نفسى الا محاسب والحمد لله ربنا كرمنى بفضله ومفيش اكتر من كده خير .
6. الميل الخاص بي هو
masry4ever@gmail.com وعلى gmail وبس وده علشان فى ناس مش عارفه الميل وبتحاول توصلى او عارفه الاسم بس مش عارفه نطاق الخدمة .
7. يا عم صطلح مشكور على مرورك الكريم للبلوج المتواضع وانت برضه مدونتك جميلة ولاحظت ان انت فى اول الطريق بس بدأيتك حلوة اوى وده شئ مبشر اوى وان شاء الله خير اما على موضوع اديسنساوى فده موضوع كبير اوى بس اللى اقدر اقوله ان انا اترفض طلبى يوم 23/7/2007 واللوحة الاعلانية الموجودة هنا لواحد صاحبى وصاحب مدونة شهيرة وان شاء الله احتمال كبير يكون بينا مشروع جامد اوى الايام الجاية .
8. فكرة البلوج جاتلى شهر 8 فى سنة 2005 بعد انفصالى عن شبكة why وده كان مشروع كويس بيضم كل الشباب ونتلكم مع بعض وكان اعز اصحابى ابوصلاح وميشو وسعد معاى فى الموضوع وبدأنا فعلاً نحضر للمشروع بس قابلتنا مشكلة التمويل فتوقف المشروع وانفصلت انا وعملت masry4ever وانفصل ابوصلاح وعمل msaae وميشو دلوقتى اسمع انه بيحضر لشغل جامد .
9. عدم ظهورى كتير فى مناسبات المدونين ده نابع من انى مش بحب اضواء لانها خادعة والشخص اللى بتسلط عليه لو كان كويس يبقى خير ولو كان وحش زى حالاتى بيأخد فى نفسه مقلب وبتبقى نكسة عليه .
10. رسالة من عائشة وبتسألنى عن الارشيف . يا عائشة الارشيف انا بعدمه تقريباً كل سنة لأن المواضيع اللى فيها خلاص بتبقى قديمة ومينفعش تتقرئ لكن اوعدك انى احضرهم ليكى وابعتلك نسخة من كل الأرشيف .
11. اعتراضى على اراء بعض المدونين وليس بصفتهم اشخاص وده حاجة طبيعية , انا بكتب فى مجال الاقصاد علشان تبقى البلد كويسة وهم بيكتبوا فى مجال السياسة علشان برضه البلد تبقى كويسة يعنى مصلحتنا مشتركة بس الطريقة هى اللى بتختلف , انا من مبدأى الحكمة والكلام المعقول مش الشتيمة على النظام والخروج على الادب , يا جماعة البلوجات دى بتتشاف بره , خلوا كلامكم بسيط شوية , وبلاش غلط لأن الصوت الضعيف هو اللى بيغلط . ما انا بقول اللى انا عايزه بس بالادب وبهدوء وببساطة , لكن مش علشان ربنا كرم بعض الناس بوصلة D.S.L ب20 اشتراك مع الجيران اروح بقى اشتم فى مصر والناس واللى فى مصر والحزب الوطنى واشتم جمال مبارك . لأ طبعاً دى ماسمهاش عيشة , انت كده تبقى مالكش رأى عمال تشتم على الفاضى وعلى المليان زى البغبان وانت مش فاهم حاجة ولا حتى عايز تفهم حاجة . حاول تقول كلمة فيها امل للناس , حاول تبسط الأمور , حاول تطلع فكرة الناس يستفيدوا منها . بجد وعن تجربة الصوت الهادئ اقوى من الصوت اللى عمال يشتم وهو مش فاهم . الناس مش ناقصة يااللى بالى بالك . " بدل من أن تلعنوا الظلام أضيئوا شمعة " .
12. زى ما كتبت يوم الأثنين اللى فات بعد احداث المحلة عن مين هو الأب الشرعى للإضراب ومحدش رد عليا الا برسالة من د/اسامة خاطر وبيقول فى رسالته ده حس الناس الوطنى هو اللى خرجهم للشوارع , وانا برد عليك يا د/اسامة طيب والشاب اللى مات " احمد على مبارك " اللى عنده 15سنة من المحلة اروح اسأل مين عنه ؟ لو رحت أسال الناس عن مين السبب ؟ هما مش عارفين ولو سألت الامن هيقولوا انتوا السبب احنا كنا بنحمى المنشاّت , يعنى من الاّخر ده اتفرق بين القبائل , بس الحمد لله انه له رب كريم قادر انه يعرف مين السبب ويوم القيامة كل واحد هيأخد حقه .
13. رسالة من هبة جوده انما دمها خفيف اوى وانا برد عليها بكل بساطة , يا هبة انا مش مرتبط وبينى وبينك مش ناوى دلوقتى , انتى عارفه بقى " العين بصيرة والايد قصيره " وكلك نظر يا هبة الدهب عيار 24 ب 161.14 يوم الأربعاء 9/4/2008 ومشكور على تهنئتك بعيد ميلادى .
14. مقالاتى على البلوج بتكون متاحة يوم الخميس باليل يعنى على فجر الجمعة تقريباً وملحق الوظائف المجمعة من الجرائد الخاصة بالمحاسبين بتبقى يوم الأثنين .
15. أ/ انور صادق . شكراً على رسالتك . والله من اجمل الرسائل اللى عندى فى البريد بس يا أستاذى الفاضل ما أدى انت شايف " سرقة حوالى أربعين جهاز كمبيوتر وحريق مدرستين ووفاة شخصين واصابة العشرات من الأمن المركزى " , ده يرضى مين يا أ/ انور . يا استاذى الفاضل حملة يوم 6 ابريل كان سمها خليك بالبيت , شفت حتى الأسم حلو ازاى . وللعلم انا لا مع الاضراب او ضده بس انا شايف انه مكنش وقته . يعنى توقيت خاطئ ده غير انى ليا تحفظات فى كيفية ادارة الإضراب ,,, بـــــــــــــس كده
16. انا لا انتمى لاى حزب سياسى فى مصر او تيار او حركة او جماعة او اى شكل من اشكال الأرتباطات لأنى لو انضمت لحزب يبقى ضمنياً موافق على جميع مواقفه وانا بحب يبقى رأى من دماغى وتبقى تصرفاتى من شخصيتى ومحدش يتحكم فيا .
17. الخلاف بينى وبين حسن القاضى خلص . وده جه عن طريقة نشره مقال اقتصادى فيه مغالطات , رديت عليه فزعل منى وكان حالف مايكلمنيش – الظاهر انى كنت مزودها شويه , لحد ما قابلته يوم الأحد اللى فات فى مكرم عبيد وشرحتله فكرتى وشرحلى فكرته بعد ما قالى دروس فى التواضع – حسن عنده 35 سنة – بس ده مشهور فى مواليد برج الحمل انهم دايماً بيأخدوا دروس فى التواضع . ابو على ليك وحشة يا غالى ودايماً حسك عامر فى الدنيا وانت برضه اخوى الكبير , والكبير معودنا على الصبر على الصغير , يا ابو ملك حمد على السلامة .
18. التعليقات هفتحها قريب . وانا كنت قفلتها لأنى حسيت انها وسيلة للدعاية لكن ان شاء الله قريب اوى هفتحها .
19. نكتة جامدة موووت بعتها محمود عيسى . يا حوده خلى بالك بنكتة واحدة دخلت سيف البنا المعتقل ونكتة ثانية ودت زينب الغزالى فى داهية . , يا ابنى انت بالنكتة دى تأخد اعدام مستريح .
20. نهاية الكلام تأمل حياتك وانسى ماضيك وعش بكرامتك فإنك تعش حياة الملوك وكل سنة وانتم طيبن .
