هل أنا فاشل ؟؟

هل أنا فاشل ؟؟

ايه ؟ ؟ هو ايه اللى بيحصل ؟ امبارح قعدت مع نفسى وسألت سؤال فى لحظة صدق لنفسى . هو أنا فاشل ؟ يعنى لما أكون شاب حديث التخرج وربنا كرمنى بشغل فى مجالى والحمد لله بحب بلدى وبعمل اللى عليه فى كل حاجة ورغم كده مش عاجب .. استغربت ويارتنى ما استغربت من قرار علاوة السيد الرئيس محمد حسنى مبارك اللى قرر فيها زيادة المرتبات بحوالى 30 فى المية .

استغربت لأنى الميزانية السنة دى كان فيها عجز 88 مليار والعلاوة دى هتحتاج حوالى 12 مليار جنيه . طيب منين يا رئيس ؟

مش عارف . بس عرفت واتأكدت لما الأسعار اتعدلت واتظبنا والحمد لله .. وده كان وضع طبيعى لتوفير الفلوس لأن ربنا عرفوه بالفطرة والعقل ازاى ادى الناس علاوة وانا عندى عجز .. مش عــــــــــــارف . . المشكلة فى العلاوة دى حاجتين ببساطة ,

اولاً . ان العلاوة دى للقطاع العام اللى فيه حوالى 6 مليون موظف ومش للقطاع الخاص . يعنى مثلاً لو انا بقبض فى الشركة بتاعتى اللى هى قطاع خاص 100 جنيه , الراجل التانى اللى بيقبض فى القطاع العام 100 جنيه هيقبض 130 جنيه يعنى مش هيحس بارتفاع الأسعار بعد التعديلات الأخيرة . لأنى لو كنت بركب مواصلات فى اليوم انا ونفس الشخص اللى فى الحكومة ب 4 جنيه مواصلات بقيت دلوقتى ب 5 جنيه ..

طيب هو دخله زاد لكن انا دخلى زى ما هو . ده بقى بيسموه صباح الهبل يا مصر ...

ثانيا . طباخين الزفة ودول اللى ماشيين مع الحكومة فى كل حاجة حتى لو كانت هتبيع هدومنا .. مش اشكال اهم حاجة ان الناس دى تفضل فى مكانها . ومن الناس دى كتاب ومفكرين ورئيس تحرير مشهور طلع يقول عهد الشرفاء وكلام كبير اوى كده مش عارف على ايه .

وقابلت امبارح واحد منهم اكبر من بكام سنة بس حته واد .. انا شخصياً شايفه فى مكانة مرموقة الأيام الجاية لأنه مثقف جداً ومنافق جداً ودى صفات الشخص المهلابتى فى مصر .. الراجل ده اول ما شفته وبعد السلامات والبوس قعدنا نتكلم عن تعديلات الأسعار ..

واجهته بارتفاع أسعار السجائر قالى ياراجل عيب عليك دولة خايفة عليك وعايز تحميك منها ده انت المفروض تشكرها ....

واجهته بالشرائح لترخيص السيارات قالى ياراجل عيب عليك هو معقول تساوى اللى معاه عربية ب50 الف زى اللى معاه عربية بنص مليون ..

واجهته بالضرائب الجديدة على المعاهد التعليمية والمدارس قالى يا راجل عيب عليك دى الدولة كانت بتديهم الأرض ببلاش وكان ليهم اعفاء لمدة كبيرة كفاية بقى . الدولة مفروض تأخد حقها ..

واجهته بارتفاع أسعار البنزين الأخيرة قالى يا راجل عيب عليك الدولة بتدعم البنزين بقالها سنين ولسه بتدعمه وان الأوان ان انت تمشى بدل ما تركب يعنى الدولة بتشجعك على الرياضة يا أحمد علشان تبقى جسمك سليم وصحى ..

انا بقى خلاص وصلت للنهاية والحمد لله انى كنت مشغول بماتش ريال مدريد والا كنت قتلته وزمانى فى السجن . قولتله مش انت تعرف عنى انى بحترم السيد الرئيس قالى ايوه طول عمرك محترم فى كلامك وبتعرض وجهة نظرك بطريقة محايدة وموضوعية .. قولتله بس المرة دى بقى لأ .. انت واى حد فى المليون متر اللى احنا عايشين فيه قولهم بصوت عاااااااااااااااااااااااااااااااااااااااااااااااااااااااالى انا بقولكم خدوا ده .. بص بقرف ليا وقالى تفكيرك بقى سطحى اوى .. قولتله الله يرحم امك ماكنتش بتقوم من على الخبيز ....

على فكرة انا لما فكرت فى اضراب يوم 23 يوليو مع انه اجازة رسمية كان الهدف هو التجمع بس يعنى احنا عايزين اى حاجة تجمعنا وفى اى يوم مش معقولة 16 مليون شاب ومش عارفين يعملوا حاجة .. اما اضراب يوم 5 يوينو هيبقى موافق امتحانات فمش معقولة نعطل امتحانات لكن المعقولة انه يوم 23 يوليو نكتب اى حاجة فى العملة فئة النصف جنيه وكل ما تشوف نص جنيه مكتوب عليه كلمة لأ .. تفتكر ان انت راجل ونفسك تعيش وتموت راجل .. انا خصلت كلامى ومستنى كلامكم ......... سلام