اضراب 4 مايو .. دعوة للتفكير

رسالة الى الوالى

أحترمك ولكن ... فاض بيّ الكيل

*سيدى الرئيس/ محمد حسنى مبارك , رئيس جمهورية مصر العربية , أم الدنيا . مع خالص احترامى وتقديرى لسيادتكم , أود ان اوضح لحضراتكم بعض الامرو التى ربما تكون غير واضحة .

* أنا ومثلى الكثير من شباب هذه البلد لا ننت الى أى حزب سياسى او اى رابطة او اى جماعة ولكن ننتمي الى تراب هذه البلد . ونحن نحاول ان نتمتع بمصداقية لان ليس لنا مصلحة حزبية او تربيطات , انما مصلحتنا المشتركة التى جمعتنا هى بلدنا الجميلة مصر.

*سيادة الرئيس , لماذا لا تشاركنا احلامنا ؟ لماذا لا تشاركنا همومنا ؟ لماذا تركتنا وسط السوق الحر نتحامى خلف اسوار هشة ونجرى وراء سراب وعندما نحقق حلم يتضح لنا انه بسيط واننا اصبحنا غير قادرون حتى على الحلم .

* سيادة الرئيس . مقدمة لسيادتكم بعض من التوضيحات والمسائل التى لا غنى عنها حتى نفخر بأننا مصريون . وكلى ثقة فى قدرة سيادتكم فى الحكم على الأمور .

1- الم تعلم ان محكمة القضاء الادارى رفضت دعاوى انشاء مصانع الاسمنت المقدم عنها طلبات للتراخيص من 14 مستثمراً , مما أدى الى ارتفاع الأسعار حتى وصل سعر الطن الى 400 جنيه واحياناً يتعدى ال 500 جنيه مع ان تكلفته الفعلية 150 جنيه مضافاً اليها هامش ربح 20 % .!

2- الم تعلن ان قصر مصانع الاسمنت فى مصر على 14 شركة فقط أدى الى تعطيش السوق . واضطراب فى الامدادات مع العلم ان الدولة تبيع الغاز بسعر مدعم لشركات الاسمنت وتقوم شركات الاسمنت بتصديره للخارج للحفاظ على حصتها السوقية فى السوق العالمية .!َ

3- الم تعلم ان الاعلام المصرى بكل قنواته فى ظل احداث المحلة الساخنة ظلّ بلا فاعلية وغير قادر على مواكبة الحدث حتى ان القناة الاولى كانت تذيع برنامج احلى اجوان .!

4 - الم تعلم ان مصر لم تتخذ حتى الان قرار واضح وصريح وجرئ فى ظل الرسومات المسئية للرسول وخاصة من دولتى الاتحاد الاوربى " هولندا , الدنمارك " . وأخيراً حادثة توقيف ومحاولة تفتيش البابا شنودة .!

5 - الم تعلم ان هنالك بطء فى المحافظة على صحة المواطن المصرى ولعل ابرزها مصنع اجريوم فى رأس البر بدمياط الذى سيؤدى الى الاصابة ب 10 انواع من الامراض , كما سيؤدى الى خسائر مقدرة ب 80 مليار جنيه , وتدهور الثروة السمكية مع استنزاف المصنع كميات كبيرة من مياه النيل لاستخدامها فى التبريد واعادة تدويرها وصبها فى البحر المتوسط .!

6 - الم تعلم ان مياه النيل التى تمثل 95% من مياه مصرالعذبة ملوثة بالمصانع المقامة على ضفافه ولا احد يتحرك .!

7 - الم تعلم عن وفاة المواطنة " امال حسن احمد " فى صراع على الخبز فى الدقهلية .!

8 - الم تعلم ان هناك عجز فى الميزانية العامة للدولة مقدراً ب 88.1 مليار جنيه . والحل حسب كلام وزير المالية هو بيع الاصول المالية وحصص الدولة فى شركات القطاع العام .!

9 - الم تعلم ان هناك فوائد فى الميزانية العامة مقدراً ب52.9 مليار جنيه وهذه فوائد القروض وتتراكم علينا حتى انهكتنا ولم نعد قادرين على الوفاء بالديون الخارجية .!

10- الم تعلم عن العراقيل التى تواجه البحث العلمى فى مصر .! وعن العراقيل التى توضع لانشاء شركة جديدة " تأسيس شركة جديدة كل 11 ثانية فى امريكا " .!

11 - الم تعلم عن عزوف الناس عن الاتخابات بكافة اشكالها واخرها الانتخابات المحلية التى لم تتعدى نسبة المشاركة فيها بأكثر من 5% وذلك سبب لاقتناع الناس بانه لم يعد هناك فائدة .!

12 - الم تعلم عن وفاة اثنين فى احداث المحلة الاخيرة 6 و 7 ابريل , احدهما يبلغ من العمر 15 سنة والاخر 20 سنة .!

13- الم تعلم ان هناك 20 مليون مصرى مصابون بمرض الالتهاب الكبدى الوبائى "سى " و12 مليون مريض بالسكر و 3.5 مليون مريض مصابون بالاكتئاب .

14 - الم تعلم ان مصر ليس بها احزاب فعالة قادرة على المنافسة والاختلاط مع الجمهور , " صراع الوفد - هبوط الغد - تدهور التجمع - فرجة حزب الجبهة الديمقراطية - صمت باقى الاحزاب " .!

15- الم تعلم ان قيمة التدفقات الخاصة بالاستثمار الاجنبى المباشر هى 10.4 مليار دولار وهى نسبة ضيئلة جداً اذا ما قورنت بالتسهيلات الممنوحة للمستثمرين مع عدم وجود ضرائب لأن المصانع تقع فى المنطقة الحرة .!

16- الم تعلم ان المعونة الامريكية هى وسيلة ضغط مباشر على الحكومة المصرية فى جميع المجالات واخرها محاولة تصدير مشكلة فلسطين الى سيناء .!

17 - الم تعلم عن ان نسبة التلوث فى مصر من اكبر النسب العالمية وان الهواء اصبح مشبع بالرصاص .!

18- الم تعلم عن محاولة ارتفاع اسعار الاسمدة الزراعية مما سوف يزيد من اسعار جميع انواع المحاصيل بغض النظر عن اضرارها المستمرة واصابة المصريين بالسرطان .!

19 - الم تعلم عن اكياس الدم الفاسدة التى لوثت اجساد المصريين بمئات الامراض والمتهم فى القضية العضو المرموق د/ هانى سرور .!

20- الم تعلم عن دعوى النقابة العامة للأطباء للاحتجاج يوم 23 ابريل القادم .!

21- الم تعلم عن ان مصر خارجياً يقال عنها انها فى مجاعة , ولم لا واخر الظواهر مشاجرات واعيرة نارية بسبب التزاحم على شراء الخبز فى قنا .!

22 - الم تعلم عن تدخل الجهات الخارجية فى شئون مصر الداخلية واخرها تلقة 15 منظمة حقوقية مبلغ 3 مليون دولار لمراقبة الانتخابات المحلية .!

23 - الم تعلم عن قانون الضرائب العقارية والجدل المثار حوله .!

24- الم تعلم عن ان مصر اصبحت فى عصر الفتاوى المضروبة والواسطة والمحسوبية والرشوة باسم الاكرامية .!

25- الم تعلم عن احتكار المهندس المحترم أحمد عز صناعة الحديد فى مصر . حتى اوصل بنا سعر الحديد الى مستويات ما فوق ال 6000 جنيه للطن وارتفاع سعر الذهب عيار 24 الى معدلات تترواح بين 150 الى 160 جنيه بعد ماكان سعره عام 2002 حوالى 27 جنيه .!

26- الم تعلم عن محاولات الناس المستمرة لتوظيف الاموال , وهذا دليل على فشل سياسة الدولة الائتمانية واخر هذه الحوادث " نصاب مدينة نصر " .!

27- الم تعلم عن تزايد معدلات السرقة وتفشى الجريمة وعدم قدرة الدولة على مواجهة ظاهرة القتل والمخدرات والزنا .!

28- الم تعلم عن عملية بيع البنوك المصرية واخرها بنك الاسكندرية واحدثها بنك القاهرة .!

29- " والله والله انا مؤمن موحد بالله لكن اقر واعترف بانى اخدت المبيد الحشرى بارادتى يوم الاربعاء 5 مارس 2008 لأن ظروفى صعبة مالهاش حل خلاص مفيش حل , خدوا بالكم من اّية وام اّية " .. هذه رسالة المواطن المصرىمحمد فتحى محمود --39 سنة المنيا بعد ان فاض بيه الكيل .!

30- الم تعلم عن صناعة السكر فى مصر مهددة بالخطر نتيجة القرارات السيادية . الم تعلم عن تعطل زراعة القطن المصرى طويل التيلة .!

31 - الم تعلم عن عقود تصدير الغاز لإسرائيل واسبانيا بسعر منخفض مع احتمال تضاؤل الاحتياطى من الغاز الطبيعى الذى لا يكفى حسب اكثر الأراء تفاؤلاًَ لامداد الاستهلاك المحلى وعقود التصدير لأكثر من 20 سنة .!

32- الم تعلم عن مضاعفة سعر المازوت . الم تعلم عن عمارة الموت التى حصدت 35 قتيلاً فى الأسكندرية .!

33 - الم تعلم عن ان الحكومة غير قادرة حتى الاّن على مواجهة مرض انفلونزا الطيور .!

34 - الم تعلم عن ارتفاع اسعار المواد الغذائية . الم تعلم عن ازمة رغيف الحياة .!

35- الم تعلم عن عبّارة الموت التى حصدت اكثر من 1000 حالة وفاة .!

36 - الم تعلم من ارتفاع اسعار اللحوم , وحتى لو توفر للمواطن المصرى شراؤه فيتضح انها لحمة حمير .!

* سيادة الرئيس., فى عيد ميلادك يوم 4 مايو وعيد ميلادى اليوم 15 ابريل , لا ادعو لاضراب من ناحيتى او اى محاولة للعصيان المدنى , ولكن الى دعوة للتفكير . ترتيب اوراق من ناحيتى يمكن الخطأ من عندى , لأنى لست ملاك وبالقطع عندى غلطات وهفوات واحاول ان اصلح من نفسى , ودعوة تفكير من سيادتكم فى السواد الأعظم من شعب مصر لأنى على يقين من ان المعلومات التى تصل اليكم هى من نوعية " الانفاق السنوى على الموبيلات 186 مليون جنيه - منتجعات بورتو وسرتور ولروتو " ومعلومات من نوعية ارتفاع النمو الاقتصاد المصرى الى 8% .

* سيادة الرئيس , مع الايضاحات السابقة لا أجد تفسيراً لتجاهل كل هذه الأحداث ومتابعة مشكلة الحضرى بل والمطالبة بحلها

سيادة الرئيس عد إلينا .. لولا الله الذى نلجأ اليه ونشكو له لكان حالنا أسوأ من الاّن .. سيادة الرئيس 6 ابريل بداية المشوار . 4 مايو دعوة للتفكير . اّن الاّوان لتغيير مصادر معلومات سيادتكم .. لأنى احترمك ولكن فاض بيّ الكيل

ابنك

رجل الحمل .. رجل الحمل بلا منازع

رجل الحمل .. رجل الإثارة

من كتابات الفلكى الايطالى " رومانو " ومع انى مش بصدق الكلام ده بس لاقيته حلو اوى ويستاهل انى اكتبه فى عيد ميلادى .

اذا درسنا عن كثب مولداً كهربائياً يعمل , او مشعلاً ناره متوجهة - اه اللى هيقرب منى هلسوعه - او قنبلة فى لحظة الانفجار - الراجل ده بدأ يغلط - . امكننا ان نكون فكرة اجمالية عن هذا النوع من الرجال , فهو رجل الاثارة بلا منازع ان كان خيراً للمرأة التى تنشد الاستقرار ان تبتعد عن دربه - والله يا عم يكون احسن برضه - , انه مشتعل العاطفة تارة , بارد كدب القطب الشمالى تارة اخرى . اذا وقع فى الحب فعلاً غاص فيه حتى اذنيه - الراجل بداً يتكلم كويس - واذا تحطم ذلك الحب لاى سبب من الاسباب عمل ما فى وسعه لجمع اجزائه المبعثرة وصبها فى قالب جديد - يعنى مش بتفرق معايا خالص - .

الاخلاص احد سماته الاساسية , لايضاهيه فى هذا الميدان احد , وبما ان الصدق مبدأه يبقى مخلصاً لمن يحب حتى فى التفكير - مش للدرجة يا عم رومانو - . اهدافه العاطفية تتسم بالنبل والجد متخطية العلاقة العابرة او اشباع الغرائز . ومطلوب من شريكة حياته لبقاء عند حسن ظنه وبذل المجهود لارضائه وجذبه والاحتفاظ به اطول مدة ممكنة - على اساس ان انا كارت شحن - فاذا فشلت تركها وراءه وراح يبحث عن اخرى ترضى مزاجه العاطفى .

اى سلاح ينجح مع هذا الرجل ؟ - المحشى علشان بموت فيه بجد - اذا لجأت المرأة معه الى الغزل الصريح المكشوف هرب بعيداً الأف الاميال. ويهرب ايضاً اذا نظرت الى غيره من الرجال - ده انا كنت اموتها قبل ما تفكر تبص - مجرد نظرة عابرة لان من صفاته الرئيسية الغيرة وحب التملك ومع انه يتوقع من حبيبته الاخلاص التام الا انه يأبى لو ظاهرياً مبادلتها بالمثل - يا واد يا تقيل - فهو مضطر بحسب اعتقاده الى اقامة بعض العلاقات البرئيةالتى تفرضها مكانته الاجتماعية - اه مش بايدى ده علشان المكانة الاجتماعية-.

هذا الرجل متمرد بطبيعته . يهوى تحدى السلطة لاعتقاده انه اذكى وافصح من اربابها . كثيراً ما تحدث له المشاكل لعدم انصياعه لغيره ولتفضيله دور السيد لا التابع - ده صحيح وانا دخلت مشاكل كتيرة بسببها - . لا يستبعد ان يحاول البعض تلقينه دروساً قاسية فى التواضع . وبهذه المناسبة يجدر بالمرأة التى يحبها رجل برج الحمل ان تقف دائماً الى جانبه ضد اعدائه وان تحب من يحب وتكره من يكره - اه انا عامل زى حسن شحاته بحب وبكره - . هذا اذا ارادت حقاً الاحتفاظ به اطول مدة ممكنة .

فى ميدان الحب يستحيل عليه التمثيل اذا هدأت عاطفته لان كل شئ فيه يشير عنذئذ الى حقيقة شعوره , يظهر فى صوته ونظراته البرود ويغلفه الضجر وقلة الصبر - ده بيحصل معايا وبيبقى شكلى وحش اوى اوى - ولكنه نبيل على الرغم من كل شئ اذا حصل بينه وبين الحبيبة سوء تفاهم بادر الى الاعتذار ولو كان الحق بجانبه - مش بيقولوا الحب سلطان - . وفى الاوقات العادية يشبعها مديحاً وثتاء ويلازم سريرها فى اوقات المرض - على اساس ان احنا مش ورانا شغل - ولا يتردد فى الانفاق عليها بسخاء بالغ . انه يتمناها انثى بكل ما فى الكلمة من معان وفى الوقت نفسه ينمى فيها روح الاستقلال والفردية , شرط الا تتخطة حدودها - هعمل فيها سى السيد- وتتبوا مكان الصدارة الذى هو من حقه وحده وان كان لا يعنى تماماً ما يقول . ولما كانت العواصف تمر عليه بسرعة مذهلة دون ان تترك اثراًُ يتوقع من حبيبته النسيان والمغفرة مهما بلغت درجة الاسى الذى سببه لها . اذن امام مولود برج الحمل احتمالان لا غير : اما ان يسود - يعنى ابقى سى السيد - او ان يترك البيت من غير عودة وعلى زوجته بدورها الا تكون سلبية او خجولة اكثر من اللازم .

سخاء هذا االرجل لا يضاهى فهو لا يبخل على حبيبته بشئ - ياما جبنا حاجات وهربت بيها - مهما قلت سبل والمورد . خير لها اذن ان تمد يد المساعدة بدورها فتدخر ولو القليل لتفاجئه به عند الحاجة . وما اكثر اوقات الحاجة عند برج الحمل - بتبدأ من يوم 7 فى الشهر - يكفى برهاناً على ذلك ايمانه بالمثل القائل " اصرف ما فى الجيب يأتيك ما فى الغيب " .

الرجل الحمل كأب عطوف محب يحنو على اولاده ويرعاهم ويؤمن لهم جميع فرص اللهو واللعب - عيل بقى - يتجاذب معهم الاحاديث ويشاركهم الهوايات والرياضة والنزهات وغير ذلك . كثيراً ما يدعوهم الى وجبة غذاء او عشاء فى افضل الاماكن العامة - يا ســـــــــــــلام هو انا حلو اوى كده , يا عم رومانو الحمد لله على الستر وعلى الصحة - .

صور اضراب يوم الأحد 6 ابريل فى المحلة

ايوه الصور دى من مصر (المحلة )

ولى تعليق عليها لاحقاً

ليه إضراب 6 ابريل فشل ؟؟

ليه إضراب 6 ابريل فشل ؟؟

اللى فعلاً ناوى يساعد الناس ربنا بيكرمه وفعلاًُ ربك هو اللى بييسر الحال , لكن اللى حصل يوم الأحد الموافق 6/4/2008 حاجة غير كده خالص , فى حد راح سخن الناس على الفكرة وبعد كده تبنتها منظمات المجتمع المدنى ونشرتها فى جميع المنتديات الخاصة بهم ده غير ال Face Book وهكذا يعنى من الاّخر مصدر الإضراب مش معروف لحد دلوقتى , لكن وبعيد عن مصدر الإضراب , انا اكتشفت ان البلد دى الناس اللى فيها غلابة اوى اوى . وهجيب ليكم الدليل دلوقتى .... 1- معظم سكان الأقاليم وخاصة الصعيد ماكنوش يعرفوا حاجة عن الإضراب ولا يحزنزن .. 2- الناس اساساً اللى عايشة فى العاصمة مش عارفه يعنى ايه عصيان مدنى ودى مصيبة اكبر . يوم الاحد الناس اختفت من الشواراع وده لأنهم كانوا خايفين على اولادهم من الصدام بين المتظاهرين والامن والكلام ده ما حصلش الا فى القاهرة ..
ميدان التحرير اللى المفروض انه يكون الحضن الامان والاب الشرعى للإضراب مكنش فيه مخلوق , انا كنت هناك على الساعة 8 الصبح وناس اصحابى كتير راحوا عشان يصوروا اى حاجة . كل اللى كان موجود هى عربات الامن المركزى . ده غير ان الجو مكنش مساعد على اى حاجة بالمرة .. طيب فين الاخوان المسلمين ؟؟ ها ها ليه دايماً الأخوان بيبعدوا عن اى مواجهة حقيقية مع النظام , بس حلو اوى ساعة الانتخابات وبس .. طيب فين حزب التجمع ؟ ها اللى هيقول هديله شيكولاته .., لا لا لا نسيت اقولكم ان فى صفقة تمت مع النظام السياسى الحاكم فى مصر لاعطاء خزب الوفد والتجمع الوناصرى عدد 19 مقعد فى الانتخابات المحلية فى الاسماعيلية . والكلام ده مش سر لان مصر كلها عارفه .. يعنى احنا قدام اضراب مش عارفين مصدره وجماعة اسلامية لها اجندتها السياسية الخاصة اللى فى وجهة نظرها اهم من العيش والسكر والمكرونة ,, احنا قدام شوية احزاب بيفرحوا بكام كرسى فى انتخابات محلية ملهاش طلب اصلاً ,,ازاى بس الاضراب كان يخرج للنور وهو فقد الاب والام ؟ ؟.. ازاى ؟؟ ازاى الاضراب ينجح فى ظل كل الظروف دى ؟؟ ده مع اعتبار سلبية قطاع كبير من الناس , لكن اللى غايظنى انا شخصياً فى الموضوع كله , صاحبى وصديقى صاحب المدونة الشهيرة اللى خرج علينا النهاردة بشعارات تقول " رجال المحلة البواسل " " النصر للمحلة " " نموت نموت وتحيا المحلة " .. روحت مكلمه وقولتله يا بنى ايه الكلام ده , هى المحلة خلاص استقلت عن مصر ولا ايه ؟؟ , وبرضه مفيش فايدة مش عايز يفهم . اقوله يا بنى معاك حق ان الامن فى المحلة ارتكب اخطاء بس مش لدرجة الشعارات اللى انت بتقولها دى .. يروح برضه مكرر عليا " نموت نموت وتحيا المحلة " . اخر اما زهقت قفلت السماعة فى وشه وقعدت ساكت فى صمت وهدوء . كل الناس فى مصر كل واحد عايز مصلحته بس . لو كان الحزب الحاكم فهو عايز مصلحته , اى جماعة تانية برضه عايزها مصلحتها , احزاب برضه عايزين مصلحتهم .. حتى الاشخاص اللى كان الامل فيهم برضه عايزين مصلحتهم عن طريق تسليط الضوء عليهم ومزيد من الشهرة ولو بشويه شعارات وعلى حساب ام الدنيا مـــــــــصــــر ..

هى دى مصر يوم 6/4/2008 , كل واحد يغنى لحاله وكل واحد مع نفسه والاسم ان احنا كلنا وطنيين . احنا كلنا بنحب مصر . يا مصريين يا اهلى الحبيب حاسبوا انفسكم قبل ان تحاسبوا . اما الاضراب نجح او فشل مش ده المهم , المهم ان احنا نتعلم من تجاربنا ونعرف مين معانا ومين اللى مع نفسه .. والحدق يفهم ! !

مش فارقة مسلم ولا مسيحى

مش فارقة مسلم ولا مسيحى

خلاص خلاص . أعلن الشعب المصرى والعربى والاسلامى عن قة حيلته إزاء كل المحاولات والاجراءات والرسوم المسيئة للرسول الكريم عليه أفضل الصلاة والسلام . وكأن لسان حالنا يقول يا عم وانا مالى . اللهم الا قلة قليلة خرجت مسرعة واثبة الى المظاهرات ويلا اهو برضه نص العمى ولا العمى كله . كنت مرة قولت فى المدونة بتاعتى القديمة ان اوربا دى كلها على بعضها علمانيين يعنى مش فارقة مسلم ولا مسيحى ولا اى حاجة حتى . واكبر دليل على كلامى توقيف البابا بطريرك الكنيسة المصرية فى مطار هيثرو فى لندن ومحاولة تفتيشه , ده غير السنة اللى فاتت الراوية اللى كسرت الدنيا واتحولت فيلم " شفرة دافشنى " اللى كانت بتتكلم وتغوص فى اصل الديانة المسيحية .

تهريج وكلام فاضى بجد اللى بيحصل ده . يبقى كل فلوسنا بره ونشترى منهم كل حاجة ورغم ذلك فى نوع من انواع البجاحة موجود ولسه هيفضل موجود . ده كده مع اعتبار ان الحكومة الهولندية مشكورة وكتر خيرها وقفت عرض الفيلم المسئ للاسلام من قبل النائب الهولندى اللى مش طايق اقول اسمه . وده ذكائ سياسى واجتماعى من الدرجة الاولى لأنها الى حد ما اتعلمت الدرس من الدنماراك بس بعد ما كنا شغالين كويس على موضوع المقاطعة , تقدر تقول كده الناس زهقت وكله بيقول ربنا يسهل لعباده .

طيب والحل , الموضوع بقى مش مقتصر على المسلمين وبس , ده مسلمين ومسيحين ,, واى حاجة طريقهم , تقدر تقول رسالة غامضة بتقول سيبكم بقى من الاديان اللى انتوا فيها وخليكوا زينا . نشتغل ونأكل ونلبس ونركب احسن العربيات واهو عايشين . بس واحد صاحبى فاكرنى بحاجة حلوة اوى , قعدت اضحك عليها حوالى ساعة .

كلام كده فى سركم بيقولوا انه فى الديانة اليهودية عندهم كده زى قصة او حاجة مشهورة بتقول ان كل اليهود فى الجنة وكل واحد نصيبه معروف ومقسوم عليه كمان بالكيلو ملا , يعنى مثلاً فلان ابن فلان هيأخد 6 كيلو فى الجنة . فالقصة بتكمل وتقول ان النفروض ان اليهود ميخلوش حد فى الدنيا عنده دين خالص وخاصة طبعاً اليهودية علشان كده نصيبك هيقل فى الجنة وبدل ما كنت هتأخد 6 كيلو هيبقى نصيبك 5 كيلو او الكيلو 4.5 الماظة - ابقى قابلنى - عند اول النادى الأهلى . ف بصراحة الاحساس ده جالى من ساعة الاحداث دى تتوالى على المسلمين والمسيحين بالذات ومفيش حد قادر الا رب العباد فعلاً هو اللى يأخد حقنا منهم .

ع العموم الناس برضه محتاجة توعية وثقافة مع كيفية التعامل مع مثل هذه الازمات . بس واحد صاحبى تانى خالص وانا بتكلم عن المقاطعة وازاى نستفيد من الاحداث اللى بتحصل علشان نبقى كلنا ايد واحدة جه جنب ودانى وقالى سؤال معرفتش ارد عليه , قالى اما انت حلو اوى كده وبتقول مقاطعة مقاطعة !! ما تستوردش بقى منهم انسولين لمرضى السكر فى مصر لأن الدنماراك بتنتج منه 70% وزيادة يا جميل . بـــــــــــصيت وقــــــــــــلت

حسبى الله ونعم الوكيل

نصائح من الاّخر الجزء الأول

نصائح من الاّخر الجزء الأول

اولاً ازيكم اخباركم ايه ؟؟ وحشتونى جداً خلال الاسبوع اللى فات , الموضوع اللى هتكلم فيه النهاردة عن الوظائف , هى شوية نصائح من عبد فقير الى الله لعلها تكون فى ميزان حسناتى ان شاء الله وده مش علشان انا بشتغل او علشان اقول الكلام ده لواحد مش بيشتغل , لكن الفكرة كانت من كمية الميلات اللى جاتنى وبتسألنى عن الوظائف .. وواحد الاقيه يقولى يا عم الاموور وانت مالك بينا ؟؟ هو انت كنت واصى علينا وهكذا يعنى . انا ياجماعة بجمع ليكم معظم الوظائف اللى بتنزل فى الجرائد وخاصة جريدة الاهرام وبكتبها هنا . يمكن اكون سبب فى انى افتح لواحد باب رزق وده يبقى فضل من ربنا سبحانه وتعالى .

انتوا شايفين قد ايه الحياة بقيت صعبة على كل الناس الغنى قبل الفقير وانا بحاول اعمل اى حاجة يمكن تكون فى ميزان الحسنات الله اعلم . نرجع بقى لمحور كلامنا النهاردة عن الوظائف .. انا هنا بكلم محاسبين وخاصة محاسبين حديثى التخرج حالتى يعنى . وهحاول اشرح ببساطة الطرق الطبيعية اللى ربنا بيكرم الواحد فيها وفى النهاية بيشتغل فى مجاله ..

1- بعد ما تطلع الشهادات المؤقتة من الكلية وتشوف الموقف من التجنيد . كده انت قطعت شوط كبير اوى فى الوظيفة . لأن انت فى ايدك المؤهل وموقف الجيش ,, كده يبقى حلو اوى ..

2- اعمل لنفسط خطة زمنية خليها حوالى 3 شهور وهقولك ليه بعد كده ..

3 - فى الفترة دى حاول تعلاف كل حاجة فى البلد ماشية ازاى . لأن انت ممكن تكون محاسب كويس اوى اوى بس مش عارف حاجة خالص الا المحاسبة وده بقى مش مطلوب دلوقتى .

4- اعلاف انت ميولك ايه " المحاسبة - التأمين - ادراة الاعمال - التسويق - المبيعات " .

5- اعمل بقى السيرة الذاتية بتاعتك بخط كويس عربى وانجليزى وياريت تكون مختصرة وبسيطة ولو انتوا عايزين , انا ممكن ارفع شوية نماذج للسير الذاتية .

6- ابدأ حصر نقاط القوة عندك " تقدير جيد - تأجيل من الجيش - شهادات كمبيوتر - انجليزى كويس " وبرضه اعرف نقاط الضعف عندك " مفيش واسطة - مش معاى فلوس اتحرك - مش عندى لبس كويس " اى حاجة انت شايفها نقاط قوة حاول تمسك فيها بايدك واسنانك ولو نقطة ضعف حاول تتخلص منها فى المرحلة دى .

7- وقبل كل حاجة ما تنساش القرب من الله عز وجل , مش علشان الوظيفة , لكن علشان ده الوضع الطبيعى . واعرف ان ملك الملوك هو اللى بيرزق العباد ولو مكتوب ليك حاجة هتأخدها ان شاء الله حتى فين لأنه رزق ونصيب .

ها اتفقنا على الحاجات دى مؤقتا .......... طيب خلاص نكمل المرة الجاية

لسانى عاجز عن التعبير

لسانى عاجز عن التعبير

ميشو صديقى العزيز والله نورت البلوج يا ميشو فعلاً بجد ومش تهريج . واتمنى ان انت تكون بصحة جيدة وكويس وفى افضل حال ان شاء الله . اما على موضوع اضراب يوم الاحد الجاى , فأنا فى الشغل قالوا اللى هيغيب هيتفصل على طول حتى من غير تحقيق فمش عارف لسه ظروفى .

يا جماعة ميشو ده من زمن الصداقة الجميلة المبنية على الحب والتعاون , ياما ضحكنا سوا وياما بكينا سوا .. وكتير اوى نبقى ماشيين ومش معانا حتى ربع جنيه . يا صديقى العزيز افتقدك بشدة انت وابو صلاح . يارب يكرمك يا ميشو ويكرمك يا ابو صلاح ودايماً كده تكون فى احسن حال وتفرحونى قريب وحد فيكم يخطب بقى . علشان نعرف ليه المخطوبين بيبقوا بيضحكوا على طول ؟؟ .. ان شاء الله خيريا ميشو واشوفك عن قريب ..

ســــــــــــلام