مكنش فى جديد

يا صباح الفل او مساء الفل المهم انه فل خلاص . يااه انا بقالى حوالى شهر ونص ما كتبتش كلمة واحدة . حاسس زى مايكون اول مرة أكتب . المهم انا الحمد لله كويس ماشى الحال . مكنش فى جديد علشان اكتب اقول حاجة ف علشان كده الواحد كان قاعد ساكت احسن . لأنه مش على الفاضى وعلى المليان الواحد هـ يتكلم . احياناً بيبقى السكوت من دهب وفضة وحاجات حلوة كده كتير . انا بس بحاول أطمئن الناس عليا واطمئن على الناس واقول اللهم تقبل منا شعبان واللهم يارب بلغنا رمضان . وان شاء الله خير علينا وعلى أمة المسلمين اجمعين يارب . اراكم قريب اوى مع مقالات جديدة وكلام جديد وحاجات جديدة ان شاء الله . وشكرا لكل اللى سأل عليا فى البلوج او بعت رسالة على الميل , بجد اللسان عاجز عن الشكر . سلام

هى الدنيا كده .. ناس ليها وناس ليها ترتر

هى الدنيا كده.... ناس ليها وناس ليها ترتر

أخيراً وبعد طول انتظار – حاجة عاملة زى ما تستنى شريط عمرو دياب – ظهر قانون الضرائب العقارية الجديد ووافق مجلس الشعب على كل مواده بعد التعديل وأصبح سارى المفعول بعد النشر فى الجرائد الرسمية .

بجد يا جماعة القانون هائل وأول مرة احس ان ترزى القوانين فى مصر المرة دى عرف يفصّل كويس والمقص معاه كان شغال زى السكينة فى الحلاوة . القانون بيوضح منهج شامل ومتكامل للضربية العقارية فى مصر هى أصلاً موجودة دلوقتى باسم العوايد بس القانون الجديد بقى أشمل وأعم . الضريبة العقارية فى القانون الجديد يصل حد الإعفاء الى ستة الاف جنيه من القيمة الإيجارية المقدرة للوحدات السكنية وهو ما يعنى ان كل العقارات التى لا تصل قيمتها حالياً فى السوق الى خمسائمة الف جنيه يتم اعفائها من الضريبة , كما ان القانون راعى الوحدات الجغرافية الجديدة – يعنى منتجعات بورتو السخنة وبالم هيلز واب تاون كايرو – والأماكن الغريبة دى ماكنش عليها ضريبة عقارية منطقية بالقيمة السوقية , يعنى اللى عنده اكتر من شقة هيضطر يفتحها ويأجرها علشان مايتحملش كل الضرائب دى . اه دلوقتى الحياة احسن وهيبقى فى عدالة ضريبية . واستمر القانون يدعم الجمعيات الأهلية والأحزاب السياسية والمنشات التعليمة بالاعفاء من الضريبة الجديدة . وبعيد عن كل ده فإن سعر الضريبة 10% من القيمة الإيجارية السنوية للوحدات السكنية وغير السكنية وذلك بعد استبعاد 30% مقابل مصاريف الصيانة للمبانى السكنية و32% مقابل المصاريف للمبانى غير السكنية ,

يعنى الدنيا حلوة وأحلى سنين والقانون زى الفل بس قلبى ما اتحملش كل الفرحة دى وفضل يدقق يدقق لحد مالاقيت بيت القصيد يعنى لاقيت اللى ماكنتش عايز اشوفه ." يؤكد القانون على ان المالك او من له حق الانتفاع او الأستغلال للعقار هو المكلف باداء الضريبة اى ان المستأجر لا يعد احد المكلفين باداء هذه الضريبة كما انه لا يجوز الرجوع على المستأجر لسداد الضريبة الا فى حدود الأجرة المستحقة عليه . واللى مخوفنى هنا ان احنا فى مصر اى قانون او اى حاجة تغلى يبقى الكل هيغلى وصاحب العقار هنا هو المسئول ومع ان العقار اللى انا فيه قيمته السوقية على بعضه مش هتحصل الف جنيه ايوه انا اقصد الف جنيه بـــس انا كلى ثقة فى انه هيرفع السعر ويغلى الايجار الشهرى واللى هيجى يتكلم معاه هيقوله روح لوزير المالية انا ماليش دعوة , طيب يا حاج ده القانون بيقول الضريبة تبدأ من قيمة سوقية ب خمسائمة الف جنيه هيقولى هو كده , طيب يا حاج ده حتى لو القيمة السوقية وصلت ل ستمائمة الف جنيه هيبقى الضريبة المستحقة 156 جنيه بس ليه هتغلى الايجار بالشكل ده ؟ هيقولى اذا كان عاجب . تخيلت المنظر اللى فات واخوى بيقولى هات خمسة جنيه زيادة للمكوجى . طلعت اشوفه وقولتله خير احنا كده حسابنا مظبوط 15 جنيه انت ليه عايز 20 جنيه ؟؟ , قاللى صباح الفل يا استاذ وكل سنة وانت طيب البنزين غلى يابرنس . قولتله مال البنزين ومال المكواه هو انت بتسخن بالبنزين يا بنى . ؟ قالى كلك نظر يا باشا وعقبال الزيادة الجديدة . .... الطمع والجشع لما يستوطن فى الناس حاجة صعبة اوى وصعب علاجها

ولو حتى بالقوانين لأنها بتبقى مسألة أخلاق

انما الأمم الأخلاق ما بقيت فان هم ذهبت اخلاقهم ذهبوا

احنا انضحك علينا يا رجالة

احنا انضحك علينا يا رجالة

هو مش عيب ان الواحد ينضحك عليه بس العيب انه يفضل ينضحك عليه . أظن كده وانت مش معاى فى ظنى . فكر بس فى اللى انا بقوله . ها , كام مرة انضحك عليك . انا بدايتى لما قالوا ليا السجائر حلوة وهتخليك راجل , لا اشرب واكبر كده ولما شربت وبقيت مش عارف ابطل عرفت بس معنى انه حد يضحك عليك . انضحك على الشباب لما ابوك وامك يقولوا ليك ذاكر يااض ذااااااااكر , ذاااااااكر علشان تجيب مجموع كبير ولما تذاكر وتجيب مجموع كبير وتيجى تقول انا عايز اشتغل , يقولك هو انت مش عارف ان البلد فيها بطالة , هو حد لاقى شغل الأيام دى ؟؟ .. وانضحك على كل العرب لما اوهمونا ان اسرائيل عايزة السلام . وفى الاّخر طلعت بتاع صواريخ وكلايشنكوف واى كلام يخص الحرب يبقى سلام مربع لإسرائيل ,, وهو ده الضحك على الدقون , طيب مش كده كفاية . كل الناس انضحك عليها . ده حتى الكبار انضحك عليهم . ده يا مؤمن الدول انضحك عليها . لكن أسوء ضحكة لما توصل للأكل . ولما توصل لقوت الناس . بجد ما تبقاش ضحكة تبقى مصيبة . تعالوا نشوف الضحكة دى ..

مصر أعلنت عام 2005 ( تقرير الاتجاهات الاقتصادية الاستراتيجية عن العام الحالى الصادر عن الأهرام ) ان المساحة المزروعة بالقمح تجاوزت 3 ملايين فدان وكان فى نفس السنة اعلنت الهند وباكستان وبنجلاديش عن توقعهم لمحصول جيد بالقمح فى ذلك العام . وفور صدور ذلك الاعلان انخفضت اسعار القمح فى البورصات العالمية حتى تراوح بين 100 و 130 دولار وهو ما مكن مصر من ان تستورد القمح فى ذلك العام بالجنية المصرى بدلاً من الدولار وكمان عليهم التسليم لحد الموانئ المصرية . واتفرج بقى على الحلاوة واللوز ,, فى تلك الفترة بدأت الدول الخمس المصدرة الكبرى المصدرة للقمح ترسل نشراتها وعلى رأسها مصر وتتسأل عن سبب توسعنا فى زراعة القمح اذا يمكن استيراده بأسعار تقل عن تكلفته محلياً , وذكروا ان سعر الاستيراد يمكن ان يصل الى 300 جنيه للطن وبدأ العرض مغرياً لمصر لأنه سيوفر 2 مليار جنيه ده غير المياه اللى هتتوفر لما نبطل نزرع قمح .

وصدقت مصر الرسالة وتقرر اغلاق باب توريد القمح المحلى فى ذلك العام قبل موعده بشهر ظناً ان هذا فى مصلحة البلد التى سوف تتمكن من استيراد القمح بأسعار تقل عن ثمن الشراء المحلى . وطبعاً ده اضر بالمزارعين فى السنة دى وخلاهم يبطلوا يزرعوا قمح فى السنة اللى بعديها ( 2006 ) لدرجة ان المساحة تقلصت الى 2 مليون فدان بــــس .. واكيد الحدق فيكم فهم بقيت الرسالة لأنه خلاص بح مفيش قمح يا حلو , القمح دلوقتى احنا بنحوله الى وقود حيوى علشان يبقى عندنا مصدر مستمر للطاقة مش زيكم مش فاهمين حاجة ..

دلوقتى القمح بين 400 و 430 دولار فى البورصات العالمية وكمان الناس مش لاقية وحسب الرسالة فإن مصر كانت هتوفر 2 مليار جنيه , دلوقتى خزينة الدولة تحملت أكثر من 6 مليار جنيه عام 2007 ومتوقع ان يزيد الرقم فى العام الحالى . المسؤل اللى وافق على الكلام ده .. يا ترى انضحك عليه كام مرة .. مرة وهو عيل صغنن ومرة وهو شاب حليوة كده ومرة لما جه يتجوز ومرة لما حب يشتغل ومرة لما .......................................................................................... الـــــــخ ... لحد ما خلى البلد كلها انضحك عليها . شفتم بقى اللى ينضحك عليه فى الصغر بتكون نهايته عاملة اازاى . ما اصلها متعووووووووودة .. البركة بقى فى الجيل الجديد اصل انا اكمان ياما انضحك عليا .. وسلام يا عثل .

جرح غير قابل للدواء

عندما تدمع عينيك بحرقة على شخص تركك وسط الطريق . عندما تعرف ان

الحياة والموت يفصل بينهم ثانية واحدة بل قل أقل من ثانية . كان أسوأ درس تعلمته يوم الأربعاء الماضى الموافق 21/5/2008 . لقد رحل منى
اناس كثيرون ولكن هذه المرة كانت الفاجعة كبيرة . من الذى سوف يدعو لىً ؟ من الذى كان عوناً وسنداً لىً ؟
سوف افتقدك طوال العمر . وكعادتك دائماً فى هدوء رحلتى بعد ألم وعذاب . لم أستطع ان أفعل لكى شيئاً طوال أيام عمرى . كنت جاحد الفؤاد ضرير البصر لم أعرف قيمتك الا عندما رحلتى . مرً الاّن على وفاتك المنية حوالى أسبوع . لماذا لم تأتى إليً فى المنام كى أطمئن عليكى . هل عرفتى بخبايا قلبى ؟ هل عرفتى بفساد نفسى؟
اذا كنتِ عرفتى فسامحينى واذا لم تعرفى فسامحينى . ليس لىً الاّن سوى الدعاء لكى بالرحمة والمغفرة . ليس ليس لىً سوى شريط من الذكريات اتذكرها من وقت لاّخر وانا مدمع العينين . القلم يرتجف وغير قادر على الكتابة . لكن صوتك مازال فى أذنى . دعائك لىً مازال ينور طريقى , حكمتك مازالت تقوىً بصيرتى . ليس لىً سوى الصبر والاحتساب . ليس لىً سوى الوقوف مع المشاهدين اشاهد الأحداث فى مطبخ الكواليس . ليس لىً سوى الألم والحسرة والندم . وفى النهاية اللهم يرحمك برحمته ويسكنك فسيح جناته وينعم عليكى بنعمة الرحمة والمغفرة .. نسألكم قراءة الفاتحة

يا لطيف بحالى قبل تكوينى اللهم لا تجعل النار تكوينى

مش كلامى بس لاقيته وعاجبنى

مش كلامى بس لاقيته وعاجبنى قلت اهوا

برضه نستفيد

1- السؤال الأول : التعبير
اكتب ما لا يقل عن 650 سطراً فى أحد الموضوعات التالية :

** لم يجد الطفل غير الشارع ملجأ نظراً لحالة البلد الهباب .. فاتجه الى السرقة والقتل والحشيش .. حتى نال جزاءه وقبض عليه متلبساً بباكتة بانجو .. اكتب قصته مع تسليم الحرز للباشا مراقب اللجنة .

** شهد بلدنا الحبيب نهضة فى مجال التشييد والبناء وخصوصاً بعد وصول سعر الحديد الى 6500 جنيه للطن .. اكتب مايمليه عليك ضميرك على أن يبدأ موضوعك بعبارة " أنا بشتغل فى حديد عز " .

** بعد انتشار ظاهرة أكل لحم الكلاب والحمير .. من وجهة نظرك تكلم عن هذه الظاهرة . ومن المتسبب فيها بدون غلط . الورق متراقب .

2- السؤال الثانى : القصة
من قصة " وعهد الله ما أنت داخل الانتخابات "
أقرأ القطعة , ثم أجب عن الأسئلة التالية :
" ثم أتى اليه وضربه بالجزمة وقال : انت عايز تترشح فى الانتخابات يا معفن ؟ دا انت عايز معجزة .. مش كفاية بتاكلوا لحمة ومستورين .. عايزين ايه تانى ؟

** ما هى اللحمة ؟ أو على الأقل حدد أقرب معنى خيالى لها ..؟؟

** مرادف " معجزة " فى اللغة ( تغير وزارى – زيادة الرواتب – رغيف العيش ) اختر يا مقلول البخت .

** حلل بمزيد من التفصيل جملة " ضربه بالجزمة " ومدى توافقها مع جملة " مصر بتقدم بينا " .

3- السؤال الثالث : النصوص
أجب عن أحد النصين الاّتيين
من نص " ما شربتش من نيلها " . أقرأ ثم أجب
" ما شربتش من نيلها . جربت تغنى لها جربت فى عز ما تحن تمشى فى شوارعها وتشكى لها "

** بعد رغبة صاحبة النص فى أن تلد ابنتها فى امريكا لتحصل على الجنسية الامريكية . اختر ما المقصود بنيلها فى النص ( المسيسبى – الأمازون – يونجيانج )

** هذا النص من نصوص الحزب الوطنى والدليل وجود اسم مهم من قيادات الحزب فى النص . استخرج الاسم . وبوسه من بقه ورجّعه مكانه .

4- السؤال الرابع : النحو

** ذهب الرئيس الى المؤتمر .. ضع الجملة السابقة فى صيغة المثنى ما عدا الرئيس طبعاً .

** كان ممدوح اسماعيل قاتلاً .. ضع " ان " بدلاً من " كان " على الا تنصب ممدوح عشان هو بينصب لوحده .

** فرضة الضرائب علينا ببشاعة .. أعرب الجملة وارفع الضرائب ابووووس ايدك ..

هل أنا فاشل ؟؟

هل أنا فاشل ؟؟

ايه ؟ ؟ هو ايه اللى بيحصل ؟ امبارح قعدت مع نفسى وسألت سؤال فى لحظة صدق لنفسى . هو أنا فاشل ؟ يعنى لما أكون شاب حديث التخرج وربنا كرمنى بشغل فى مجالى والحمد لله بحب بلدى وبعمل اللى عليه فى كل حاجة ورغم كده مش عاجب .. استغربت ويارتنى ما استغربت من قرار علاوة السيد الرئيس محمد حسنى مبارك اللى قرر فيها زيادة المرتبات بحوالى 30 فى المية .

استغربت لأنى الميزانية السنة دى كان فيها عجز 88 مليار والعلاوة دى هتحتاج حوالى 12 مليار جنيه . طيب منين يا رئيس ؟

مش عارف . بس عرفت واتأكدت لما الأسعار اتعدلت واتظبنا والحمد لله .. وده كان وضع طبيعى لتوفير الفلوس لأن ربنا عرفوه بالفطرة والعقل ازاى ادى الناس علاوة وانا عندى عجز .. مش عــــــــــــارف . . المشكلة فى العلاوة دى حاجتين ببساطة ,

اولاً . ان العلاوة دى للقطاع العام اللى فيه حوالى 6 مليون موظف ومش للقطاع الخاص . يعنى مثلاً لو انا بقبض فى الشركة بتاعتى اللى هى قطاع خاص 100 جنيه , الراجل التانى اللى بيقبض فى القطاع العام 100 جنيه هيقبض 130 جنيه يعنى مش هيحس بارتفاع الأسعار بعد التعديلات الأخيرة . لأنى لو كنت بركب مواصلات فى اليوم انا ونفس الشخص اللى فى الحكومة ب 4 جنيه مواصلات بقيت دلوقتى ب 5 جنيه ..

طيب هو دخله زاد لكن انا دخلى زى ما هو . ده بقى بيسموه صباح الهبل يا مصر ...

ثانيا . طباخين الزفة ودول اللى ماشيين مع الحكومة فى كل حاجة حتى لو كانت هتبيع هدومنا .. مش اشكال اهم حاجة ان الناس دى تفضل فى مكانها . ومن الناس دى كتاب ومفكرين ورئيس تحرير مشهور طلع يقول عهد الشرفاء وكلام كبير اوى كده مش عارف على ايه .

وقابلت امبارح واحد منهم اكبر من بكام سنة بس حته واد .. انا شخصياً شايفه فى مكانة مرموقة الأيام الجاية لأنه مثقف جداً ومنافق جداً ودى صفات الشخص المهلابتى فى مصر .. الراجل ده اول ما شفته وبعد السلامات والبوس قعدنا نتكلم عن تعديلات الأسعار ..

واجهته بارتفاع أسعار السجائر قالى ياراجل عيب عليك دولة خايفة عليك وعايز تحميك منها ده انت المفروض تشكرها ....

واجهته بالشرائح لترخيص السيارات قالى ياراجل عيب عليك هو معقول تساوى اللى معاه عربية ب50 الف زى اللى معاه عربية بنص مليون ..

واجهته بالضرائب الجديدة على المعاهد التعليمية والمدارس قالى يا راجل عيب عليك دى الدولة كانت بتديهم الأرض ببلاش وكان ليهم اعفاء لمدة كبيرة كفاية بقى . الدولة مفروض تأخد حقها ..

واجهته بارتفاع أسعار البنزين الأخيرة قالى يا راجل عيب عليك الدولة بتدعم البنزين بقالها سنين ولسه بتدعمه وان الأوان ان انت تمشى بدل ما تركب يعنى الدولة بتشجعك على الرياضة يا أحمد علشان تبقى جسمك سليم وصحى ..

انا بقى خلاص وصلت للنهاية والحمد لله انى كنت مشغول بماتش ريال مدريد والا كنت قتلته وزمانى فى السجن . قولتله مش انت تعرف عنى انى بحترم السيد الرئيس قالى ايوه طول عمرك محترم فى كلامك وبتعرض وجهة نظرك بطريقة محايدة وموضوعية .. قولتله بس المرة دى بقى لأ .. انت واى حد فى المليون متر اللى احنا عايشين فيه قولهم بصوت عاااااااااااااااااااااااااااااااااااااااااااااااااااااااالى انا بقولكم خدوا ده .. بص بقرف ليا وقالى تفكيرك بقى سطحى اوى .. قولتله الله يرحم امك ماكنتش بتقوم من على الخبيز ....

على فكرة انا لما فكرت فى اضراب يوم 23 يوليو مع انه اجازة رسمية كان الهدف هو التجمع بس يعنى احنا عايزين اى حاجة تجمعنا وفى اى يوم مش معقولة 16 مليون شاب ومش عارفين يعملوا حاجة .. اما اضراب يوم 5 يوينو هيبقى موافق امتحانات فمش معقولة نعطل امتحانات لكن المعقولة انه يوم 23 يوليو نكتب اى حاجة فى العملة فئة النصف جنيه وكل ما تشوف نص جنيه مكتوب عليه كلمة لأ .. تفتكر ان انت راجل ونفسك تعيش وتموت راجل .. انا خصلت كلامى ومستنى كلامكم ......... سلام

تاريخ البلوج ده

تاريخ البلوج ده

1. النهاردة مش هتكلم عن الاقتصاد ولا عن قصة اجتماعية ولا حتى عن حالة سياسية انما هتكلم شويه عن البلوج ده وبعض علامات الاستفهام عليه .

2. انا بشكر كل الناس اللى بيبعتوا ليا رسائل على الميل سواء بالنقد او التوجيه او النصح او اى حاجة لانها فعلاً بتكون منارة على الطريق وبقدر بيها اصلح اخطائى واعرف انا ماشى ازاى ورايح فين .

3. البلوج اسمه masry4ever وخلى بالك من رقم 4 لأنه مهم جداً علشان حصل التباس عند الناس بينه وبين بلوج تانى , البلوج ده طلع للنور اغسطس سنة 2005 وبيعتبر من اقدم البلوجات فى المنطقة العربية كلها وعلشان كده والحمد لله البلوج بيتمتع بمصداقية كبيرة فى الاوساط مجتمعة .

4. البلوج ده مرّّّ ب 3 مراحل لحد دلوقتى , اول مرحلة من اغسطس سنة 2005 لحد نهاية سنة 2006 وكنت ساعتها بكتب فى اى حاجة واى موضوع بس كان اغلبية المواضيع عن الجامعة والنتيجة واللى حصل النهاردة والكلام العسل ده , وانا فاكر ان انا صورت فيديو ورفعته هنا ومش هنساه ابداً وكان عبارة عن واحد بيحاول يتعرف على واحدة وهى مترددة فى القبول او الرفض وكانت مدة الفيديو 40 ثانية بس لكن عمل ضجة ساعتها ملهاش حل , والمرحلة التانية للبلوج من اواخر سنة 2006 لحد شهر 5 فى سنة 2007 ودى كانت مرحلة بيغلب عليها الطابع الدينى مع معلومات بسيطة عن المحاسبة لأنى كنت ساعتها فى البكالريوس وحسيت انى بدأت افهم حاجة , المرحلة التالتة للبلوج بدأت من شهر 9 سنة 2007 ولحد دلوقتى وان شاء الله مستمرة وهى انى بعرض افكارى الاقتصادية والمحاسبية اللى انا درستها فى الكلية وبشارك المحاسبين فى الافكار والبرامج والدورات وعنوان المرحلة دى " اول بلوج اقتصادى اجتماعى فى الوطن العربى " .

5. رسالة جميلة جداً جاتلى من واحد اسمه احمد الشناوى وفيها كلام مؤثر ونصائح بجد غالية اوى عليا وانا يا ابن الشناوى لو قعدت ارد على كل رسالتك يبقى هغير اسم البلوج واخليه الرد على الشناوى لانها طويلة اوى بس انا هحاول اقولك الفكرة العامة . ياسيدى انا اسمى احمد وعندى 22 سنة وفاضلى كام يوم واكمل 23 سنة وحالياً بشتغل محاسب فى القطاع الخاص , بحب مجالى جداً ومش متخيل نفسى الا محاسب والحمد لله ربنا كرمنى بفضله ومفيش اكتر من كده خير .

6. الميل الخاص بي هو

masry4ever@gmail.com

وعلى gmail وبس وده علشان فى ناس مش عارفه الميل وبتحاول توصلى او عارفه الاسم بس مش عارفه نطاق الخدمة .
7. يا عم صطلح مشكور على مرورك الكريم للبلوج المتواضع وانت برضه مدونتك جميلة ولاحظت ان انت فى اول الطريق بس بدأيتك حلوة اوى وده شئ مبشر اوى وان شاء الله خير اما على موضوع اديسنساوى فده موضوع كبير اوى بس اللى اقدر اقوله ان انا اترفض طلبى يوم 23/7/2007 واللوحة الاعلانية الموجودة هنا لواحد صاحبى وصاحب مدونة شهيرة وان شاء الله احتمال كبير يكون بينا مشروع جامد اوى الايام الجاية .

8. فكرة البلوج جاتلى شهر 8 فى سنة 2005 بعد انفصالى عن شبكة why وده كان مشروع كويس بيضم كل الشباب ونتلكم مع بعض وكان اعز اصحابى ابوصلاح وميشو وسعد معاى فى الموضوع وبدأنا فعلاً نحضر للمشروع بس قابلتنا مشكلة التمويل فتوقف المشروع وانفصلت انا وعملت masry4ever وانفصل ابوصلاح وعمل msaae وميشو دلوقتى اسمع انه بيحضر لشغل جامد .

9. عدم ظهورى كتير فى مناسبات المدونين ده نابع من انى مش بحب اضواء لانها خادعة والشخص اللى بتسلط عليه لو كان كويس يبقى خير ولو كان وحش زى حالاتى بيأخد فى نفسه مقلب وبتبقى نكسة عليه .

10. رسالة من عائشة وبتسألنى عن الارشيف . يا عائشة الارشيف انا بعدمه تقريباً كل سنة لأن المواضيع اللى فيها خلاص بتبقى قديمة ومينفعش تتقرئ لكن اوعدك انى احضرهم ليكى وابعتلك نسخة من كل الأرشيف .

11. اعتراضى على اراء بعض المدونين وليس بصفتهم اشخاص وده حاجة طبيعية , انا بكتب فى مجال الاقصاد علشان تبقى البلد كويسة وهم بيكتبوا فى مجال السياسة علشان برضه البلد تبقى كويسة يعنى مصلحتنا مشتركة بس الطريقة هى اللى بتختلف , انا من مبدأى الحكمة والكلام المعقول مش الشتيمة على النظام والخروج على الادب , يا جماعة البلوجات دى بتتشاف بره , خلوا كلامكم بسيط شوية , وبلاش غلط لأن الصوت الضعيف هو اللى بيغلط . ما انا بقول اللى انا عايزه بس بالادب وبهدوء وببساطة , لكن مش علشان ربنا كرم بعض الناس بوصلة D.S.L ب20 اشتراك مع الجيران اروح بقى اشتم فى مصر والناس واللى فى مصر والحزب الوطنى واشتم جمال مبارك . لأ طبعاً دى ماسمهاش عيشة , انت كده تبقى مالكش رأى عمال تشتم على الفاضى وعلى المليان زى البغبان وانت مش فاهم حاجة ولا حتى عايز تفهم حاجة . حاول تقول كلمة فيها امل للناس , حاول تبسط الأمور , حاول تطلع فكرة الناس يستفيدوا منها . بجد وعن تجربة الصوت الهادئ اقوى من الصوت اللى عمال يشتم وهو مش فاهم . الناس مش ناقصة يااللى بالى بالك . " بدل من أن تلعنوا الظلام أضيئوا شمعة " .

12. زى ما كتبت يوم الأثنين اللى فات بعد احداث المحلة عن مين هو الأب الشرعى للإضراب ومحدش رد عليا الا برسالة من د/اسامة خاطر وبيقول فى رسالته ده حس الناس الوطنى هو اللى خرجهم للشوارع , وانا برد عليك يا د/اسامة طيب والشاب اللى مات " احمد على مبارك " اللى عنده 15سنة من المحلة اروح اسأل مين عنه ؟ لو رحت أسال الناس عن مين السبب ؟ هما مش عارفين ولو سألت الامن هيقولوا انتوا السبب احنا كنا بنحمى المنشاّت , يعنى من الاّخر ده اتفرق بين القبائل , بس الحمد لله انه له رب كريم قادر انه يعرف مين السبب ويوم القيامة كل واحد هيأخد حقه .

13. رسالة من هبة جوده انما دمها خفيف اوى وانا برد عليها بكل بساطة , يا هبة انا مش مرتبط وبينى وبينك مش ناوى دلوقتى , انتى عارفه بقى " العين بصيرة والايد قصيره " وكلك نظر يا هبة الدهب عيار 24 ب 161.14 يوم الأربعاء 9/4/2008 ومشكور على تهنئتك بعيد ميلادى .

14. مقالاتى على البلوج بتكون متاحة يوم الخميس باليل يعنى على فجر الجمعة تقريباً وملحق الوظائف المجمعة من الجرائد الخاصة بالمحاسبين بتبقى يوم الأثنين .

15. أ/ انور صادق . شكراً على رسالتك . والله من اجمل الرسائل اللى عندى فى البريد بس يا أستاذى الفاضل ما أدى انت شايف " سرقة حوالى أربعين جهاز كمبيوتر وحريق مدرستين ووفاة شخصين واصابة العشرات من الأمن المركزى " , ده يرضى مين يا أ/ انور . يا استاذى الفاضل حملة يوم 6 ابريل كان سمها خليك بالبيت , شفت حتى الأسم حلو ازاى . وللعلم انا لا مع الاضراب او ضده بس انا شايف انه مكنش وقته . يعنى توقيت خاطئ ده غير انى ليا تحفظات فى كيفية ادارة الإضراب ,,, بـــــــــــــس كده

16. انا لا انتمى لاى حزب سياسى فى مصر او تيار او حركة او جماعة او اى شكل من اشكال الأرتباطات لأنى لو انضمت لحزب يبقى ضمنياً موافق على جميع مواقفه وانا بحب يبقى رأى من دماغى وتبقى تصرفاتى من شخصيتى ومحدش يتحكم فيا .

17. الخلاف بينى وبين حسن القاضى خلص . وده جه عن طريقة نشره مقال اقتصادى فيه مغالطات , رديت عليه فزعل منى وكان حالف مايكلمنيش – الظاهر انى كنت مزودها شويه , لحد ما قابلته يوم الأحد اللى فات فى مكرم عبيد وشرحتله فكرتى وشرحلى فكرته بعد ما قالى دروس فى التواضع – حسن عنده 35 سنة – بس ده مشهور فى مواليد برج الحمل انهم دايماً بيأخدوا دروس فى التواضع . ابو على ليك وحشة يا غالى ودايماً حسك عامر فى الدنيا وانت برضه اخوى الكبير , والكبير معودنا على الصبر على الصغير , يا ابو ملك حمد على السلامة .

18. التعليقات هفتحها قريب . وانا كنت قفلتها لأنى حسيت انها وسيلة للدعاية لكن ان شاء الله قريب اوى هفتحها .

19. نكتة جامدة موووت بعتها محمود عيسى . يا حوده خلى بالك بنكتة واحدة دخلت سيف البنا المعتقل ونكتة ثانية ودت زينب الغزالى فى داهية . , يا ابنى انت بالنكتة دى تأخد اعدام مستريح .

20. نهاية الكلام تأمل حياتك وانسى ماضيك وعش بكرامتك فإنك تعش حياة الملوك وكل سنة وانتم طيبن .